Atualità

I posć metüs a desposiziun por la jonëza dl Südtirol danter i 18 y i 28 agn por fá n volontariat zivil provinzial é por chësc ann de 135, tl 2014 nen êl ma 82. Incö (21 de aurí) á la Junta provinziala aproé la bandida de concurs por le 2015 cun investimënc de 911mile euro. Implü á la Junta dé löm vërda por n regolamënt d’atuaziun nü por le comerz de vijinanza te zones produtives.

Dal 2011 al 2014 á la sozieté dla SEL investí indöt 92,5 miliuns de euro por le refornimënt cun energies renovables, de conseguënza él sëgn 24.000 families implü tl Südtirol che s’anüza de energia sostenibla. Chëstes y d’atres zifres ti é gnüdes presentades incö (21/04) ala Junta provinziala dal presidënt dla SEL, Wolfram Sparber.

120 scolars dala scora elementara cina la scora alta fej para al proiet “Rundenì de lijëndes”, che vëiga danfora l’elaboraziun de n poem musical por rapresenté musicalmënter la tradiziun de valüta dles liëndes ladines te n contest atual. La pröma rapresentaziun é gnüda presentada inier, 20/04 a Urtijëi, incö sarál les secundes döes (16:30 – 20:30) a Urtijëi y atres döes sará ai 24/04 a San Martin.

Sté chic n momënt y ponsé do a ci che é veramënter important tla vita – chësc é l’impuls che la scomenciadia „Before i die, i’d like to…“ ti ô dé ai jogn y che é gnüda presentada incö, lönesc ai 20 de aurí, a Balsan tl contest di Dis d’aziun de Formaziun politica 2015. Les aziuns sará despartides sö sön döta la Provinzia, dai 23 de aurí ince tles valades ladines.

La donaziun de organs é na tematica sensibla che se damana de n’informaziun prezisa por motivé i zitadins da detlaré süa aprovaziun por daidé paziënc che á debojëgn de n traplant. Deache i tëmps de speta é aumentá l’ann passé tl Südtirol él gnü metü da jí la campagna de sensibilisaziun „Spende Leden – Dona vita“ por informé i zitadins y che gnará presentada ai 17/04 a Balsan.

Sostigní l’archirida tl setur dl’agricoltöra da munt por amplié süa importanza tl setur dl’economia locala: chësc á sotligné l’assessur provinzial Arnold Schuler tratan l’incuntada di mëmbri dla lataria „Brimi“ incö (17/04) a Porsenù. „Les lataries soziales dl Südtirol pó ciamó mioré süa posiziun tres n renforzamënt dla colaboraziun y sostigní insciö ince de plü i zidladús.“

Le Ciamp Inovaziun y Consulënza informëia che da incö, vëndres ai 17 de aurí, él da ciafé sön süa plata internet ofiziala n codejel de presentaziun y spligaziun dla grafia nöia dl Ladin dla Val Badia. N codejel te na verjiun stampada cun dötes les informaziuns ti gnará proscimamënter metü a desposiziun ai insegnanc y ales insegnantes dles scores ladines dla Val Badia.

La poscibilité da ti dé na familia ai mituns y ales mitans é la chestiun prinzipala dl’adoziun. Por sensibilisé i zitadins sön chësta forma speziala de raport él la Repartiziun Politiches Soziales che á metü da jí na campagna de sensibilisaziun. Dai 20/04 inant gnarál taché sö placac sön les architades dles corieres te Gherdëna, a Balsan, tl Sarntal, tl Salten-Scilier, y sön le Ritten.

Düc i artisć y dötes les artistes dl Südtirol, de Fascia y di trëi Comuns de Suramunt á ciamó tëmp cina ai 29 de má da dé jö sües operes d’ert por le Concurs artistich 1915 – 2015 che é gnü scrit fora dala Repartiziun Cultura ladina en gaujiun dl centená dla Pröma Vera Mondiala. Le valur complessif di pesć é de 20.000 Euro. Ara se trata dla terza ediziun de chësc concurs.

L’ediziun nöia dla revista dla Comisciun provinziala por l’avalianza dles ëres dal inom „ëres – Fraueninfodonne“ tematisëia te süa verjiun plü atuala la rapresentanza de jëne tla politica cun n’odlada ales proscimes eleziuns comunales dl mëis de má te Südtirol.