Atualità

Le proiet de renovamënt dl’aministraziun provinziala reverda inće l’internet cun na presënza nöia che baratarà fora la misciun atuala www.provinzia.bz.it dla Rëi Zivica. Deboriada cun n demane nü ciafarà l’Aministraziun provinziala inće na süa plata d’azès y n motor de chirida efiziënt fora dla ćiasa Google, che ti po pormez a düć i contignüs y sorvisc dl’aministraziun interna.

Al é ormai na bela tradiziun interladina le tornê de hockey por les scores mesanes che vëgn organisé chësc ann por le 5 iade tles valades ladines. Chësc ann gnarà le tornê organisé a Corvara dal Sorvisc Sport Scolastich dl’Intendënza Ladina de Balsan en vëndres ai 20 de merz cun scomenciamënt dles partides dales 9 tl Stadium dla dlacia “Albert Pezzei”.

I coliamënć transfrontaliers y la situaziun di pendolars sura i confinns é stades les döes tematiches zentrales che é gnüdes tratades incö (12 de merz) a Cuira tratan l’incuntada dla Junta provinziala dl Südtirol cun i rapresentanć dl Chantun Grijuns dla Svizra.

La promoziun dl’ativité artistica, tignì a mënt i avenimënć y les conseguënzes dla Pröma Vera Mondiala y le raport atual impara 100 agn dedô: Chisc é i obietifs dl Concurs artistich 1915 – 2015 che é gnü scrit fora dala Repartiziun Cultura ladina y che é gnü aproè dala Junta provinziala. Fà para po düć i artisć dl Südtirol, de Fascia y di trëi Comuns de Suramunt.L’ultim dé por dè jö é ai 29 de mà.

Le concurs por lingać foresć dl raiun dl Tirol por scores profescionales dl’edema passada a Desproch à portè a n resultat plajor por le Südtirol: Tl concurs de inglesc, a chël che i mius 24 dl Südtirol, dl Tirol dl Nord y dl Ost à tut pert, él stè Otto Trebo da Al Plan che é rové al cuarto post dla tlassifica finala.

L’Agenzia por le svilup sozial y economich (ASWE) à paié fora tl 2014 indöt 322 miliuns de euro de sorvisc sciöche por ejëmpl contribuć por la cura, la prevenziun y les familes. Tratan na conferënza stampa incö, mercui ai 11 de merz, à les assessuries Martha Stocker, Waltraud Deeg, le presidënt Karl Tragust y le diretur Eugenio Bizzotto dè na suraodüda sön les ativitês te chësc ćiamp.

L’Ispetorat por les scolines comunichëia che ćina ai 31 de merz él tëmp por dè jö les domandes de trasferimënt y por aspetatives tla Direziun dles scolines a Urtijëi o a Picolin.

I fonds metüs a desposiziun dal program 2015 por l’inrescida scientifica y por l’inovaziun é de indöt 110,3 miliuns de euro. Incö (11 de merz) él gnü aproé le documënt strategich ćina al 2020 da pert dla Consulta cun a ćé le presidënt Kompatscher. Tl dagnì gnaràl inće sostignì tres de plü la colaboraziun danter i partnes dl setur.

L’Ofize Ćiacia y pëscia lascia alsavëi che da śëgn ćina ai 2 de aurì saràl poscibl da se scrì ite ala pert de teoria dl ejam da iagher.

Sun nvit dl Istitut Ladin Micurà de Rü iel dan da puech unit a se l dé doi ancuntedes cun i maestri che nsënia ladin tla scoles elementeres, mesanes y autes de Gherdëina y dla Val Badia.