Atualità

Le pat de garanzia é gnü confermè da pert dla Ćiamena di deputać. La Junta à tut sö incö cun sodesfaziun la noela. Implü à la Junta tut dezijiuns sön n contribut straordinar ala Ćiasa dla solidareté, sön le elisocurs y le mantignimënt di jori danter Balsan-Roma, do che la compagnia de fligri Darwin à desdit le contrat de sorvisc.

Na odlada zoruch sön les arjuntes dl ann 2014 y na odlada inant sön les sfidades dl dagnì gnarà presentades dal presidënt dla Provinzia Arno Kompatscher en lönesc, ai 29 de dezëmber te na conferënza stampa a Balsan.

La firma dles convenziuns danter la Provinzia cun i fonds de ponsiun y les banches da incö (23/12) é le segnal de start por l’atuaziun dl model „Sparagn por la Ćiasa“ che prevëiga n imprëst alisiré por la cumpra, la costruziun o le ressanamënt dla pröma ćiasa tres le sparagn complementar por la ponsiun. Le model sarà operatif ti pröms mëisc dl 2015.

Formaziun, ajornamënt, mioramënt dl azès al marćé dl laûr, n’aministraziun efiziënta y la combatüda cuntra la meseria y les descriminaziuns: Chisc é i seturs por chi che al é preodü co-finanziamënć dal Fonds Sozial Europeich dal 2015 inant por i proscims cinch agn (ćina le 2020). La Junta provinziala à aprovè incö (23/12) le program opearif, che gnarà ejaminé śëgn dal’UE.

I Museums Ladins Ćiastel de Tor (San Martin) y Ursus Ladinicus (San Ćiascian) deura indô sües portes ai 26/12 do la palsa sajonala da d’altonn. Ai 30/12 vëgnel metü da jì tl Museum Ladin a San Martin la festa tradizionala por la fin dl ann cun entrada debann al Museum, intratignimënt musical, füć d’artifize, na chentlada jö por la pista da “Picolin” y n sorvisc de trasport da Picolin al Ćiastel.

Les acordanzes cun les banches y cun i fonds dla ponsiun gnarà sotescrić indoman (23/12) en presënza dl presidënt dla Provinzia Arno Kompatscher y dl assessur competënt Christian Tommasini. Cun la sotescriziun dles acordanzes pol pié ia concretamënter le model „Sparagn por la ćiasa“ (Bausparen). Le terminn é indoman dales 12 ala fin dl’incuntada dla Junta tl salf dles sentades tl Palaz Widmann.

Le catalogh nü sön la mostra „Le cör dla ćiasa – La stüa tla Val Badia“ de indöt 170 plates y cun na seria ampla de fotografies é gnü presentè inier, domënia (21/12) tl Museum ladin Ćiastel de Tor a San Martin dal assessur por la scora y cultura ladina Florian Mussner.La publicaziun contëgn n’inrescida storica y etnografica dla stüa tla Val Badia y vëgn completada da documentaziuns fotografiches.

L’app SüdtirolToGo pîta na poscibilité d’informaziun pratica y asvelta sön i orars y i coliamënć dl trasport publich tl Südtirol. Te na manira scëmpla pon insciö chirì sön le fonin les informaziuns sön i orars, i tëmps de speta, les trasses y i coliamënć dejidrà: l’app „SüdtirolToGo“ é da püch gnüda ajornada cun les verjiuns ladines de Gherdëina y dla Val Badia.

Indöt él sis implanć portamunt nüs cun n investimënt de 60 miliuns de euro: l’Ofize Implanć portamunt dla Provinzia à fat n bilanz dl ann 2014 y à costatè cun sodesfaziun che dötes les furnadoies é gnüdes realisades en tëmp por le mëteman dla sajun da d’invern.

Sön les trasses dla ferata locala él gnü registré d’otober indöt 932.682 timbradöres. „Al é le valur de timbradöres plü alt che é gnü registré da tres te un n mëis tl Südtirol, y al é la testimonianza che l’oferta ampla de ferates locales vëgn anuzada tres de plü dai utënć“, sotlignëia l’assessur por la mobilité Florian Mussner.