Atualità

USP - Por coordiné damì la politica dl trafich tl raiun dles Alpes s’à incuntè incö, ai 4 de jügn, l’assessur por la mobilité Florian Mussner cun Ingrid Felipe, assessuria por la mobilité dl Tirol. Tematica dla incuntada é inće stada la edema dl trafich dal 23 al 27 de jügn a Desproch.

USP - Deache l’assessur por l’agricoltöra Arnold Schuler sarà indoman, jöbia ai 5 de jügn, a Roma por tó pert ala conferënza regionala sön l’agricoltöra, mëss la presentaziun dl raport nü sön l’agricoltöra y l’economia forestala gnì spostada.

USP - Por podëi stabilì na lista de prioritês ajornada s’à incuntè da püch l’assessuria por les politiches soziales Martha Stocker adöm cun le diretur de repartiziun Luca Critelli cun indöt 90 rapresentanć de organisaziuns a Kardaun. „N program unitar por ći che reverda les politiches sanitares y soziales va debojëgn, inće por stlarì les prioritês tl setur sanitar y sozial“, dij Stocker.

USP - Da śëgn inant gnarà i contribuć por i pendolars paià fora do criters nüs stabilis dala junta provinziala: “L’obietif prinzipal dla mudaziun di criters é chël da sostegnì deplü les porsones che à efetivamënter n tru lunch y compliché por jì sön le post de laûr”, dij l’assessur por la mobilité Florian Mussner. Les domandes por contribuć po gnì fates ćina ai 29 de agost.

USP – Tratan la sentada dla Junta provinziala da incö él inće gnü stabilì les integraziuns nezesciares por studënć dles scores altes che stüdia foradecà. Tematiches importantes é inće stades la colaboraziun sura-regionala dles Regiuns dla Euregio y le sostëgn finanziar ai studënć dles scores altes che alojëia dalunc dales families.

USP - La Junta dla Provinzia da Balsan à aprovè incö danter l’ater l’aplicaziun unitara dl proporz linguistich por i laûrs de direziun tl setur sozio-sanitar, le program cuincuenar por la manutenziun straordinara y por i laûrs d’adatamënt dla infrastrotöra sozio-sanitara provinziala y l’aumënt dl’oferta por i sorvisc d’assistënza tratan le domisdé y l’isté 2014 por i mituns.

Pröma sentada dl Consëi d’aministraziun nü dla RAS, presënt inće le presidënt dla Provinzia Arno Kompatscher, y pröma definiziun dles proscimes prioritês: l’ampliamënt dla fira otica y i programs dla televijiun te HD.

La detlaraziun, che le Sorvisc Strades dla Provinzia ti fajess concorënza ales dites dl post, ne lascia l’assessur Florian Mussner nia avarëi: "Feter döt le budget dl Sorvisc Strades va a bëgn dl’economia locala; ma por la manutenziun straordinara él gnü inćiarié indöt 70 firmes dl post", recorda Mussner. Le valur de chëstes inćiaries é de feter 12,2 miliuns de euro.

USP - Ai 31 de mà él le “Dé mondial cuntra le fomé” y l’assessuria por la sanité Martha Stocker anüza l’ocajiun por sotligné che la cutaziun sön le tabach é öna dles mosöres plü efetives por diminuì le consum de tabach. En chësc cunt él inće da recordè la proibiziun da fomé ti locai publics tla Talia; na mosöra che aumentëia inće la cualité dla vita.

USP – Mituns adotifs, mitans adotives y les families interessades à debojëgn de n aiüt permanënt y sistematich. Por podëi respogne damì ales nezescitês di mituns, dles mitans y inće di geniturs vëgnel atualmënter laurè fora n conzet de prevenziun da pert di ofizi de competënza dla Provinzia.