Atualità

Danter Longega y Al Plan vëgnel metü man chisc dis i laûrs por arjigné i rôs dl internet aslöm. Cun chisc laûrs scomëncia na linia de intervënć da pert dla Provinzia de Balsan por portè i coliamënć de fira otica tla Val Badia. L’internet aslöm assigurëia le dagnì economich y sozial ti paîsc da munt, sciöche i nüsc” sotrissëia l’assessur provinzial Florian Mussner.

L problem di destubs tl mparé y mëter a verda se lascia for plu sentì nce tla scoles ladines. Per ti jì ancontra a chësc problem di sculeies à l Servisc de cunsulënza y ntegrazion tenì na spezialisazion de trëi ani. N vënderdi 24 de mei uniral a Sarns sëurandat diploms a 25 nsenianc dla scoles ladines.

Na cunvenzion inuvativa che mët n drova l federalism nce tl ciamp dla radiotelevijion y che gëura la streda ala Val d’Aosta y al Friul: nsci iel (NCUEI) ai 16 de mei unì prejentà a Roma la cunvenzion nueva Stat-RAI-Provinzia de Bulsan per la trasmiscions televijives y radio tla rujeneda tudëscia y ladina. Chësc var storich, dantaprima per la mendranza ladina, ie unì prejentà dal sotsecreter dla Presidënza dl Cunsëi di Ministri Giovanni Legnini, dal presidënt dla Provinzia Luis Durnwalder, dal assessëur Florian Mussner y dal diretëur generel dal RAI Luigi Gubitosi.

La costruziun de biblioteches al dedaincö, les "Ćiases dl savëi” é l’argomënt de na sëra de referać cun discusciun tla biblioteca provinziala Teßmann a Balsan. La sëra ai 30 de mà fej pert dla linia de referać dal titul “Texturen”.

Per via dla festa de Pasca de Mei ne tën la Jonta provinziela si senteda nia n lunesc che vën, ma perchël n merdi ai 21 de mei. Riesc do, dala 12.30 tën l presidënt dla Provinzia na cunferënza stampa.

Per doi rejons furnea l presidënt dla Provinzia Luis Durnwalder duman, juebia, 16 de mei a Roma. Cun i respunsabli dla ferata se tratela de udëi tan inant che i ie cun la proietazion per l raion dla stazion dla ferata a Bulsan. Deberieda cun l assessëur ladin Florian Mussner vëniel prejentà co che unirà metù n drova la cunvenzion nueva per la RAI tudëscia y ladina a Bulsan.

For plu fulestieres, na populazion che devënta for plu vedla y la families for plu pitles: chisc ie trend prinzipei che n possa liejer ora dai truep resultac dla cumpededa dla jënt che ie unic prejentei (NCUEI) ai 15 de mei a Bulsan. “Aldò di resultac statistics muessa la politica tò i pruvedimënc per seguré l daunì” à dit l presidënt dla Provinzia Durnwalder.

L’Urchestra sinfonica di jëuni dl Südtirol chier jëuni y jëunes de duta la grupes de rujeneda. L possa fé pea jëuni strumentisć da 14 a 24 ani.

Tl raion de Moritzing a Bulsan vëniel frabicà n spedel nuef. Per udëi co che va inant i lëures vijitea l presidënt dla Provinzia Durnwalder cun i assessëures Florian Mussner y Richard Theiner n mierculdi ai 22 de mei l cantier.

Al’economia y ala sozietà ie dedicà n cudejel nuef per l nseniamënt dla rujeneda ladina tla soles autes. Chësta publicazion dl Servisc Inovazion y Consulënza dl Departimënt Educazion y Cultura Ladina ie la prima de na lingia de materiai didatics sun la storia ladina. L cudejel ie n sustëni al nseniamënt de ladin, che ie unì aumëntà tla scoles autes.