Atualità
-
Iscrizions ala scolines ladines dai 18 ai 20 de fauré
USP – A scumenciamënt dla terza ena de fauré, dai 18 ai 20, uniral tla scolines de Gherdëina y dla Val Badia tëut su l’iscrizions per l ann de scolina 2013-2014. I plu pitli che possa unì scric ite ala scolina tla valedes ladines muessa nchin ala fin de fauré 2013 avëi cumplì doi ani.
-
Nchin ai 30 de jené dumandes per l ejam de ladin per nsenianc
USP – Per ruvé tla graduatories de nsenianc tla scoles ladines muessen avëi fat n ejam de ladin dedicà. L proscimo ejam per nsenianc sarà chësta ann ai 20 de merz, n possa se lascé nuté su nchin al plu tert n mierculdi ai 30 de jené.
-
31 de jenà y pröm de forà tles scores altes da La Ila
USP – I scolars y sü geniturs che mëss tó na dezijiun sön ći fà do la scora mesana po ai 31 de jenà y al pröm de forà s’informè sön ći che les scores altes da La Ila pîta. Te chisc dui dis ti vëgnel daurì les portes dl Istitut Tecnich Economich, dl Lizeum Linguistich y dl Lizeum dles Sciënzes Umanes a dötes les porsones interessades.
-
Jëuni possa fé pratica tla Provinzia
USP - Sculeies dla scoles autes, studënc de università y jëuni che à finà l studi giata nce chëst ann la puscibltà de fé nchin a trëi mënsc de pratica ti ufizies dl’Aministrazion provinziela. La cunescënza de plu rujenedes gëura la streda per pudëi fé esperienza de lëur nce tla scoles y ti ufizies destachei a Roma y a Bruxelles.
-
Dala senteda dla Jonta provinziela dl 21 de jené (cun audio)
La cuantificazion dl dann dla smueia che fova unida ju a Badia, la chëuta nueva sun l refudam y n pest per l’energia alternativa ie deberieda cun la lege de ntegrazion di imigrei stai i argumënc prinzipei dla senteda dla Jonta provinziela che l presidënt Luis Durnwalder à prejentà te cunferënza stampa.
-
Lege de ntergrazion: Provinzia chier pusciblteies
USP - La lege provinziela de ntergrazion ie stata n cumpromis danter n tratamënt valif per duc n cont de pruvedimënc soziei y l schivé che jënt da oradecà vënie me adalerch per via de chisc aiuc. Da pert dl Stat ne vëniel nia azetà la limitazion di 5 ani de lëur y residënza, nscì ie la Provinzia sfurzeda a crì do pusciblteies nueves.
-
Chëuta y finanziamënt per l refudam tratei dala Jonta provinziela
USP – Doi iedesc ie l refudam (NCUEI) ai 21 de fauré stat argumënt dla senteda dla Jonta provinziela. N cont dla chëuta nueva TARES uelen abiné n mesun per mantenì l prinzip che premia chiche fej manco refudam. A na maniera che l custimënt dl furnel dal refudam de Bulsan ne toma nia sun la tarifes, uniral adurvà scioldi che ruva da Roma per l’energia alternativa.
-
7 milion de dann a Badia
USP – La smueia de Badia, che fova unida ju a mez dezëmber, à fat n dann materiel de 7 milion de euro. La Jonta provinziela à (NCUEI) ai 21 de jené recunesciù chësta cuantificazion dl dann.
-
Vecchia Romagna vënc l cuncors de scultures de dlacia per sculeies
USP – Tl zënter de Urtijëi à sculeies dl Lizeum d’ert cun Scola prufesciunela „Cademia“ ntan duta l’ena laurà per n cuncors de scultures de dlacia. Danter la cin bozes che ie unides zipledes te na mesura 10 iedesc mo ntan granda, à (NCUEI) ai 18 de jené, venciù la scultura “Vecchia Romagna”. L cuncors metù a jì te na culaburazion cun la Lia turistica y l Chemun à pità lezions de scola particuleres ai sculeies y na bela atrazion turistica per l luech.
-
Tesć de idoneité por maestri y maestres de schi, de paslunch y de snowboard
USP - De merz gnaràl tignì i tesć d’idoneité por maestri y maestres de schi, de paslunch y de snowboard. Les porsones interessades po se scrì ite pro l’ofize provinzial Turism y alpinism ćina ai 15 de forà dl 2013.