Atualità

USP – Per i osć che mëina la uties da mont che la Provinzia ova sëurantëut dal CAI iel mpurtant savëi canche l possa unì fat lëures de ressanamënt. Na lista dla prioriteies che unirà laureda ora dal departimënt dl assessëur Florian Mussner dajerà respostes. La Jonta provinziela à (NCUEI) ai 26 de nuvëmber nce fat ora che i osć possa nstës fé pertes dl ressanamënt che unirà pona tenì cont tl fit.

USP – La cooperatives de garanzia, l sustëni al export y l fond de rotazion ie la trëi seves prinzipeles de culaburazion danter la Provinzia y la banches per sustenì l’economia da tlo. Śën ie mo ruveda leprò la mira de n parchet de pruvedimënc acioche firmes gëure filieles ti mëndri luesc da na pert ora. La cumiscion aldò à (NCUEI) ai 26 de nuvëmber fat na relazion ntan la senteda dla Jonta provinziela.

USP – L cianté dla mutans y di mutons se adateda particularmënter tl tëmp d’Avënt. Pra l cunzert d’Avënt de grupes ladines tl Dom de Bulsan, cianterà ai 14 de dezëmber nce l Cor di mutons de Sëlva. Deberieda cun mo cin’ d’autra grupes uniral dat demustrazion dla tradizion ladina de cianté l Avënt al publich de Bulsan.

USP – Pro le conzert d’Advënt metü a jì dal Assessorat ladin tl Dom da Balsan podaràn inće aldì le cor di ëi Col dla Vedla da Rina. Ai 14 de dezëmber ćiantarà y sonarà sis grups ladins por ti presentè al publich de Balsan la particolarité culturala ladina da ćiantè l’Advënt. Cun le conzert gnaràl inće pité na ocajiun de incuntada danter les cultures.

USP – Danter la prioriteies che la grupa europea de culaburazion teritoriela (GECT/EVTZ) à (NCUEI) ai 20 de nuvëmber fat ora te si senteda a Bulsan iel nce proiec sozio-saniteres cun referimënt ala jënt de tëmp, scumenciadives de cooperazion, mubilità y la prima edizion dl camp da instà-EUREGIO per sculeies dla scoles mesanes. La grupa metuda adum dala provinzies de Trënt, Bulsan y Tirol à tl palaz Widmann a Bulsan tenì si senteda de jonta y reunion generela cun i presidënc Luis Durnwalder, Lorenzo Dellai y Günther Platter.

USP – Cun l ressanamënt de 400 cuatieres al ann uel l departimënt dl frabiché abitatif y l Istitut per cuatieres soziei IPES avëi tant’ de cuatieres a desposizion da pudëi i sëurandé a chiche à nce me 25 ponc. Sëuraprò vëniel laurà per mëter a desposizion cuatieres al categuria de davani mesan. Chësc ie unì prejentà dal assessëur Tommasini y dal presidënt dl IPES Pfitscher (NCUEI) ai 20 de nuvëmber a Bulsan.

USP – N merdi ai 27 de nuvëmber mostra l Lizeum d’Ert y la Scola prufesciunela per l artejanat artistich si lëures, nstalazions, teatri, esperimënc, fotos y video dedichei ala mujiga. Ntan chësc di dla porta davierta puderà sculeies dla mesana, si genitores y duc i nteressei nstës udëi cie che n possa mparé te chësta doi scoles autes a Urtijëi.

La Jonta provinziela à fat ora de se paré al recurs dl Guviern talian sun la lege provinziela de toponomastica. Tla senteda dl 19 de nuvëmber iel pona nce unì dat pro i prinzipies dla lege nueva per la families y ndicazions per la cuestion dla SEL. Ntan la cunferënza stampa riesc do la senteda dla Jonta à l presidënt Luis Durnwalder nce prejentà n cudejel nuef per nfurmé i turisć dl’Autonomia.

USP – Sies milion de turisć vën ann per ann a fé feries tl Südtirol. Ajache chësta jënt à daniëura nce dumandes de politica y de cumenanza, che ne ie nia for saurì da respuender, à la Jonta provinziela lascià stampé 200.000 cudejiei de nfurmazion. L presidënt dla Provinzia à (NCUEI) ai 19 de nuvëmber fat al savëi che i cudejiei unirà menei ora a duta la lies turistiches mo dan che scumëncia la sajon da inviern.

USP – I cuntrac de lëur danter la SEL y si diretëur generel da dant Maximilian Rainer ie (NCUEI) ai 19 de nuvëmber unic ejaminei dala Jonta provinziela che à dat pro che l ne dëssa nia unì paià ora vel pertendudes de pesć sun l davani dla sozietà. Sun pruposta dl assessëur Mussner iel unì trat de reviers la cunzescion per fé strom dla sozietà “Stein an Stein”.