Atualità

USP – La dezijiun de ći fà do la scora mesana à de gran conseguënzes sön le svilup di jogn. Por tó na dezijiun val debojëgn de informaziuns sön les poscibilitês che vëgn pitades. De chësc vers sostëgn les scores altes da La Ila les families che mëss tó na dezijiun. (DOMAN) En mertesc, ai 20 de novëmber vëgnel pité na sëra de informaziun por i geniturs.

USP – La soluzion data pro te Cunsëi provinziel per ressolver la descuscion sun la toponomastica tla provinzia de Bulsan ne vën nia azeteda dal Guviern talian che à fat recurs pra la Chëurt costituzionela. Te si senteda da (NCUEI) ai 19 de nuvëmber à la Jonta provinziela fat ora de se paré y sce l ie de bujën nce de se damandé sustëni a livel nternaziunel.

USP – I prinzips dla lege nueva sun la families ie (NCUEI) ai 19 de nuvëmber unì dai pro dala Jonta provinziela. La mira prinzipela dla lege nueva ie dantaprima de coordiné miec i servijes y la defrënta pusciblteies de sustëni.

USP – Pra l cunzert d’Avënt tl Dom de Bulsan sarà chëst ann nce da audì la grupa “Trio dl’ëiles de Gherdëina“ cun Otto Dellago. De ndut cianterà y sunerà ai 14 de dezëmber sies grupes de Gherdëina y dla Val Badia per purté dant la tradizion ladina de cianté l Avënt al publich de Bulsan. La mujiga fajerà pra chësc cunzert da puent danter la grupes de rujeneda.

USP – Tl raion dl Scilier iel unì njenià la cundizions per taché ite i culegamënc internet a slune. La zentreles de Sëuc y Völs, vijitedes (INIER) ai 15 de nuvëmber dal presidënt dla Provinzia, ie me doves de 155 che vën mudernisedes dala Telecom. Nchin ala fin dl ann iel danter auter nce udù dant de taché ite la zentrela a Mantëna Todëscia.

USP – Te cin agn, da canche al é gnü metü su l’assiguraziun dla cura, à passa 14.000 porsones ciafè n sostëgn por na soma de 611,8 miliuns de euro. Tl bilanz de chisc cin agn, à l’assessur Richard Theiner podü constatè (INCÖ) ai 16 de novëmber a Balsan, che an à ciafè na soluziun a na moda che la jënt pois gnì curada a ćiasa, che le Südtirol po y mëss se vaghè inće tl dagnì.

USP – Cun la sotescriziun dl assessur Mussner à la Provinzia de Balsan azetè l’acordanza danter le Ministêr por l’ambiënt y les regiuns por mëte a jì le program dla Convenziun dles Alpes sot la presidënza dla Talia. L’acordanza é gnüda sotescrita (INIER) ai 15 de novëmber a Roma.

USP – La comunità europea uel mëter a jì na cualificazion unitera per i maestri de schi. N reprejentanza dla Jonta provinziela, se pera l assessëur Hans Berger contra na tel regula ajache la ne vëija nia dant standard sciche tl Südtirol. (NCUEI) ai 14 de nuvëmber à Berger, deberieda cun l presidënt di maestri de schi dl Südtirol Claudio Zorzi, tëut pert a n’ancunteda a Brüssel ulache i se à damandà i standard y à giapà sustëni da d’autri raions.

USP – I custimënc y la nvestizions aldò dla ntredes dla Provinzia, l bilanz per l 2013, ie esprescion dl mpëni per limité l custimënt publich, sustenì la families, dé na sburdla ala furmazion y al’inuvazion. Aldò de chisc prinzipeies ie unì metù adum l bilanz de previjion de 5,068 miliardes che ie (NCUEI) ai 14 de nuvëmber unì prejentà dal assessëur ala finanzes Roberto Bizzo.

USP - La cultura particulera de cianté l Avënt che ie unida mantenida ti luesc ladins unirà chëst ann inò prejenteda al publich de Bulsan. Te n mëns, ai 14 de dezëmber cianterà sies grupes ladines tl Dom de Bulsan.