Atualità

USP – L Istitut per educazion musichela de rujeneda tudëscia y ladina chier nsenianc de mujiga per la chitara “E”. Tl ann nuef uniral perchël fat n ejam de cualificazion per nsenië a suné la chitara “E”. Nteressei possa se lascé nuté su nchin ai 4 de dezëmber.

USP – I geniturs é les porsones de referimënt plü importantes canche ara se trata da chirì fora le tru de formaziun do la scora mesana. Por sostignì i geniturs y i educadus pîta l’Ofize provinzial Orientamënt scolastich y profescional dal 12 de novëmber inant n valgönes sëres de consulënza. De dezëmber vëgnel inće pité na sëra por ladin a San Martin y a La Ila

USP – La plata internet dl nightliner se presentëia śëgn cun na iesta nöia; cun le logo unitar "Nightliner Südtirol" ti é l’assessur provinzial por la mobilité Widmann jü do sides al’adoranza tres majera de media digitai, che inće ales audanzes di rapresentanć di jogn.

USP – Le sistem d’evaluaziun dles scores dl Südtirol é gnü metü a jì danü. La Junta provinziala à aprovè na ordinanza che à le fin da garantì y svilupé la cualité dla scora te chëra che al vëgn odü danfora na evaluaziun interna y esterna.

La for majera cumpëides de jënt zënza lëur ie stat l argumënt zentrel dla senteda dla Jonta provinziela ai 05 de nuvëmber. Dlongia na prima pert de pruvedimënc acioche de plu persones ruve pra na stiera, à l presidënt dla Provinzia Luis Durnwalder tla cunferënza stamp nce prejentà l sustëni per la produzion de films tl Südtirol y la regula nueva n cont dl’atestazion de sanità per sculeies.

USP – Per sparanië burocrazia y custimënt à la Jonta provinziela dat pro che i sculeies, do vester stai amalei plu de cin dis, ne muessa nia purté n atestazion dl dutor che i ie ntonn.

USP – 14 produzions de films giaterà n sustëni dala Provinzia. Chësta dezijion à la Jonta provinziela tëut do che l fova unì mandà ite la dumandes per la terza pert dl sustëni finanziel. Cun chësc pruvedimënt vëniel dat n sustëni a produtëures y atëures da tlo, arjunjan nce che l Südtirol sibe for inò da udëi te films.

USP – Tla Provinzia de Bulsan iel belau 8000 persones zënza y la cuota ie ultimamënter cresciuda al 3,7%. La Jonta provinziela se à te si senteda (da NCUEI) dl 05 de nuvëmber dat ju cun pruvedimënc per tenì permez a chësc trend y acioche de plu jënt ruve nsci pra na stiera. Chi che ie zënza lëur messerà azeté cie che ti vën cunsià dal ufize dl lëur y nsci se adaté mo de plu al marcià dl lëur.

USP – L’azienda de rediotelevijion RAS pieta dal 15 de nuvëmber l program culturel ORF III sëuraprò. L canal de televijion trata dantaldut cultura, ntraunides d’atualità, scienza, nfurmazion y ntegrazion europea. Leprò uniral nce mustrà trëi programs te na mo miëura cualità visuela.

USP – En domënia ai 28 d’otober vëgnel tignì le gran batadù tl Museum Ladin Ćiastel de Tor deboriada cun l’Uniun di Stödafüch da San Martin de Tor. L’incuntada é dales 13.30, dailò vëgnel inće tut sö les iscriziuns y fat l’estraziun di grups.