Atualità

L crì n’aleanza cun l’autra regions autonomes per se paré dala mpustazions dl Stat sun la cumpetënzes autonomes tl cheder di pruvedimënc de sparani ie stat l argumënt zentrel dla senteda dl 16 de lugio (Domesdì saral n’ancunteda dla regions autonomes dl nord). Sëuraprò à la Jonta provinziela tratà la prima pert dla lege sun la familia, la gestion dl furnel dal refudam a Bulsan y la soluzion per l material che vën giavà ora dl tunel dl Prëner. L presidënt Luis Durnwalder à cunedì la dezijions prinzipeles tla cunferënza stampa riesc do la senteda.

USP – Majera pert dl material che vën giavà ora a fé l tunel dl Prëner vën nuzà. Per chëla pert che ne possa nia unì nuzeda à la Jonta provinziela (NCUEI) ai 16 de lugio dat pro na soluzion. Te chësta senteda iel nce unì dat pro i reprejentanc dla cumiscion scientifica.

USP – L furnel dal refudam nuef a Bulsan ie la resposta dla Jonta provinziela a un di majeri bujëns di chemuns: chël de tò y jì l refudam. I lëures ie bele a n bon pont y n auter ann dëssel bele jì n funzion, ma sën ne iel nia plu tler chi che dëssa sëurantò chësc mplant. La Jonta provinziela à (NCUEI) ai 16 de lugio fat ora de lascé lauré ora na pruposta.

USP – La Jonta provinziela à dat pro la prima pert dla pruposta de lege per la families. La pert data pro (NCUEI) ai 16 de lugio reverda l’assistënza di fantulins te chëla che l ie dantaprima debujën de na unificazion dl finanziamënt.

USP - Dan che la Provinzia compra opres d’ert, iel de bujen che na cumiscion valuteie l cajo. Sun pruposta dl assessëur Florian Mussner à la Jonta provinziela (NCUEI) ai 16 de lugio dat pro chësta cumiscion per la pert ladina.

Per mparé a cunëscer miec l’esperienza che i ladins-rumatsch à fat te passa 20 ani cun si rujeneda unificheda, se à na delegazion de istituzions ladines ancuntà cun promotëures, l’aministrazion cantonala y reprejentanc locai dla Val Müstair. Cun la vijita ti Grijons à la delegazion ai 23 de mei pudù capì miec cie che à funziunà y ciuni che ie stai i majeri fai: dut chësc per pudëi valuté miec la situazion dl Ladin standard per l raion dla Dolomites.

USP – 66 jëuni ie chëst ann passei l ejam de stat y à nscì finà via la preparazion dla scoles autes ladines per zapé ite tl mond dl lëur. Danter i resultac dl ann de scola, prejentei (NCUEI) ai 13 de lugio dai assessëures provinziei ala scoles luna ora che tla scoles autes iel belau n chert che ne à nia finà l ann de scola positivamënter. Pra i ejams dla scoles mesanes y autes ladines ne vëniel nia me damandà doi rujenedes, ma nchin a cin rujenedes.

USP - Pra la gran mostra de ert nueva “Panorama 4” a Franzensfeste iel nce unì nvià cater artisc’ ladins. Aron Demetz y Gerhard Demetz ie ejëmpli di artisć ladins che à bele fat streda. Fabian Feichter y Diego Perathoner ie pert de na generazion jëuna che porta na vëta nueva tla maniera de fé ert ti luesc ladins. Tla sëuravijion dl’ert atuela tl Südtirol iel da ndut da udëi 33 posizions de ert contemporanea. – Na prejentazion de Diego Perathoner

USP - Te chësc mumënt iel 291 mutons y mutans che possa viver pra families de cura. Ma la cumpëida de genitores che ie desposc’ a tò su per n pez mutons o mutans d’autra families che à problems, va do ju. Tlo uelen judé cun na campania per furmé cuscienza, metuda a jì dala repartizion per familia y soziel, y prejenteda (NCUEI) ai 11 de lugio dal assessëur provinziel Theiner.

USP – La situazion ie tan sussot che la jontes provinzieles de Bulsan y Trënt se à metù adum per se paré dala invajion normativa da pert dl Guviern Talian te si mpëni de ressané la finanzes stateles. La doi jontes provinzieles deberieda cun i assessëures regiunei à tla senteda de crisa, (NCUEI) ai 11 de lugio a Bulsan, fat ora de se damandé n’ancunteda de prëscia cun Mario Monti per marciadé ora tant che la provinzies dëssa paië y per fé valëi l respet dl’Autonomia.