Atualità

USP – La cuestion di zitadins che se n va dai pitli luesc per jì a viver te zità ie stata n majer argumënt dla senteda dla Jonta provinziela dl 21 de merz (NCUEI). Aldò de n studi dl Astat y analises dl ufize de cumpetënza, an tratà la situazion atuela, prinzipeies y periculi. Tla proscima enes dëssel unì analisà la singula situazions ti luesc.

USP – Aldò dl program dl Istitut per cuatieres soziei IPES uniral nchin dl 2015 frabicà 1200 cuatieres soziei. De ndut dëssa la cumpëida de cuatieres unida auzeda de 2400. La Jonta provinziela de Bulan à (ncuei) ai 21 de merz dat pro l program dl Istitut per cuatieres soziei udan danterauter nce dant de nia plu tò n cunsciderazion la dumandes singularmënter per uni chemun, ma a livel de raion.

USP – Cun l proscimo ann de scola muda l nseniamënt tla Scola “Cademia” a Urtijëi. Nchinamò fova la spezialisazion artistica la pert zentreda de chësta scola auta, d’autonn 2011 scumëncia n nseniamënt nuef ulache l ti unirà dat n majer pëis ala furmazion de basa. La reforma dla scola auta à nce purtà n inuem nuef: la Scola d’Ert devënta n Lizeo d’Ert. Iscrizions vën mo tëutes su nchin ai 31 de merz.

USP – L liber nuef sun la storia di ladins dla Dolomites pieta na panoramica a 360° sun storia y sun la realtà culturela di ladins tla cin valedes ladines. La publicazion nueva unirà prejenteda dai respunsabli dl Istitut Culturel ladin ‘Micurà de Rü’ deberieda cun l presidënt dla Provinzia Durnwalder y l assessëur Mussner n juebia ai 24 de merz, dala 12.00, tl Palaz Widmann a Bulsan.

USP – Nteressei a nsenië tla scoles ladines possa nchin n vënderdi ai 18 de merz mo de ju la dumandes de unì tëuc su tla graudatories per i nsenianc. Da nuef permez ai ani passei, iel che chëst ann muessa la dumandes unides dates ju tla Ntendënza ladina a Bulsan.

USP – Che la ntegrazion de sculeies cun problems de autism ie for plu sentida à ncuei danmesdì (16 merz) testemunià l gran nteres de 450 persones al cunvëni sun l autism. Deberieda cun esperc de gran inuem chier culaburadëures dla scola, sanità y genitoresc do stredes nueves per capì miec cumpurtamënc y manieres de viver de persones cun carateristiches de autism. L’assessëur Mussner à laudà dassënn l lëur de ntegrazion che vën fat tla scoles ladines.

USP – N sustëni nuef per cuatieres dëssa judé pro che la jënt reste ti zëntri di luesc mpede frabiché te raions nueves. La Jonta provinziela à (ncuei) ai 14 de merz dat pro n sustëni per cumpré n vedl cuatier, n pue’ sciche l sustëni che fova bele per frabiché y per la nfrastrutures primeres.

USP – Mplanc de sciaudamënt nchin a 35 chilowatt ne muessa damòinla nia plu unic cialei do regularmënter dal scoaciamin. Chësc ie unì fat ora (ncuei) ai 14 de merz dala Jonta provinziela.

USP – La Jonta provinziela à inò fat n var inant per ti tò la forza ai monumënc dl fascism. Per i ossares iel unì dat pro l cialé ora dla tofles de spiegazion. Per l monumënt de vitoria y per l relief sun l palaz dla finanza iel unì dat pro la cumiscions. Nadia Moroder de Urtijëi reprejentea la grupa de rujeneda ladina.

USP – Per culaburazions de sajon à la Jonta provinziela me plu damandà 800 lizënzes. A Chësta maniera uelen limité la cumpëida de mo culaburadëures nia europees sëuraprò y dal’autra pert ti unì ncontra ala jënt da tlo che ne à nia da lëur.