Atualità

USP – Ntan chësc ann dëssel unì frabicà per feter 170 milion de euro. I programs prejentei dal assessëur Florian Mussner ala Jonta provinziela vëija dant nvestizions per scoles, spediei ma nce truepa stredes y zircunvalazions.

USP – De plu sentedes iel stat debujën per lauré ora la cuestions tachedes al’imigrazion, (ncuei) ai 21 de fauré à la Jonta provinziela dat pro la pruposta de lege prejenteda dal assessëur Bizzo. N spera che l Cunsëi provinziel posse mo dé pro chësta lege dan la fin dl ann.

USP – I calëndri de scola dëssa, da scola a scola, deventé plu valives. N vënderdi ai 18 de merz, l di do la festa naziunela ne dëssel nia unì juntà mo n di de feries y l program per l sport te scola ie stai argumënc tla senteda dla Jonta provinziela (ncuei) ai 21 de fauré.

USP – La Jonta provinziela ne uel nia lascé pro che l vënie fat mulins dal vënt sun la montes dl Südtirol. L presidënt Durnwalder à (ncuei) ai 21 de fauré cunedì la dezijion de mascima cun ezezion per l proiet sun i ëures sëura l Prëner.

USP – L’ancunteda dl presidënt Durnwalder cun l diretëur generel dla ferata statela, stata n vënderdi, ie nce (ncuei) lunesc, 21 de fauré stata argumënt dla senteda dla Jonta provinziela. L bujën de cumedé ca de plu stazions y pusciblteies de sëurandé la cunzescion per la trata da Bulsan y Maran ie unì azetà da tramedoi pertes.

USP – Te si prima senteda dl ann à la Cunsulta provinziela per la cultura ladina tëut tres de plu dumandes che ti ani passei. Feter duta la 111 dumandes ie unides azetedes y nsci puderal unì fat l decret dla pert dl assessëur provinziel ladin per paië ora i cuntribuc. Te chësta prima pert de dumandes azetedes se tratel de cuntribuc per na soma de 391.000 euro.

USP - Manfred Mölgg à venciù la bedaia de bront dl slalom di campionac dl Mond a Garmisch Partenkirchen. Auguresc dal presidënt dla Provinzia Luis Durnwalder che à laudà la bedaia de Mölgg sciche ncuronazion de na edizion storica di campionac dal pont de ududa dl Südtirol.

USP - Le lingaz dla uma é n valur che ne dess nia ma gnì sotrissé en ocajiun dl dé internazional che le recorda. Na pert de ci ch’i sun é lié al sonn y significat de chësc prüm lingaz ch’i un aldì da pici insö, che à formè nosc pinsier y dè parores a nüsc sentimënc”, scrî l’assessur Florian Mussner en ocajiun dl dé internazional dl lingaz dla uma ai 21 de forà.

USP – Tl 2019 ulëssa la Provinzia de Bulsan deventé l zënter dl nteres culturel de Europa. Deberieda cun i raions dl Nordest dla Talia se anjinien ala candidatura per deventé capitela europea dla cultura 2019. N juebia ai 24 de fauré uniral a Bulsan sotscrì la fundazion dl cumité de candidatura cun vel nota ladina.

USP – I mestieres dl artejanat artistich à purtà bënsté y cualità de vita te Gherdëina. Chisc mestieres pieta mo for na bona basa de furmazion per jëuni che à na bona man artistica. N vënderdi ai 25 de fauré possa duc i nteressei vijité la scola prufesciunela a Urtijëi y se fé n cheder dl nseniamënt che vën pità n auter ann tl cuntest dla reforma dla scola auta.