Atualità

USP – La Jonta provinziela à tei si senteda dl 31 de jené (ncuei) scumencià a traté n sistem nuef de abunamënt al trasport publich. N ulëssa pité n sëul abunamënt che vel per dut l raion provinziel a na maniera che sëuraprò al viac che n fej plu suvënz, possel nce unì adruvà per vel viac te n auter raion. I priejes che ne fova nia plu unic tuchei per 15 ani muessa unì auzei. L sistem nuef premia chiche fej plu chilometri cun l servisc publich.

USP – Pra l cënsimënt dla populazion dla provinzia de Bulsan, de utober 2011 uniral adurvà na regulamentazion nueva per la detlarazion dla grupa de rujeneda. La Jonta provinziela à te si senteda (da ncuei) dl 31 de jené dat pro che per la detlarazion a fin de statistica dëssel me unì tëut n cunsciderazion i zitadins de naziunalità taliana che à l di de referimënt la residënza tla provinzia. A chësta maniera giapa i ladins, sciche mëndra grupa de rujeneda, n majer pëis.

USP – Per si prestazion straurdinera y per vester na persunalità de referimënt per dut l Südtirol, à l presidënt dla Provinzia Luis Durnwalder fat i auguresc a Carolina Kostner, vizecampiunëssa de Europa de jadiné artistich. “Kostner y i autri atlec che à venciù bedaies ntan l fin dl’ena desmostra tan inant che n possa ruvé tl sport sce n tën permez y à na tel mentalità da ejëmpl” à dit l presidënt dla provinzia.

USP – L proiet de ressanamënt y mëter adum la scola mesana cun la scola elementera a S. Martin ie unì azetà dala cumiscion tecnica dla Provinzia de Bulsan.

USP – Pra l cunvëni scientifich sun l plurilinguism te scola, l ultima ena a Coira/Chur à la Scola ladina cun si model paritetich giapà gran stima da truep esperc de livel nternaziunel. L cunvëni à purtà truepa ideies nueves y à cuntribuì a miuré y ntensifiché l cuntat danter scola ladina y la ‘Scola auta da pedagogia dal Grischiun’.

USP – Nteressei al lauré te scolina o te scola ladina muessa avëi fat l ejam de ladin per pudëi fé pert dla graduatories. Tl mëns de fauré vëniel pità cursc de preparazion per l ejam che sarà chëst ann ai 21 de merz.

USP – La Jonta provinziela à udù dant 800 milion de euro ora dl bilanz 2011 per la gestion di spedei. Chësc à fat al savëi l presidënt dla provinzia Durnwalder tla cunferënza stampa do la senteda dla Jonta dl 24 de jené (ncuei).

USP – La pruposta lege de imigrazion ie do doi spëntes, (ncuei) ai 24 de jené passeda tla Jonta provinziela. “On abinà na bona streda danter dërc y duvieres di zitadins che vën da oradecà” à cunedì l presidënt Durnwalder”. A duc ti vëniel garantì i servijes de basa y l dërt de studië. L vën damandà cin ani de residënza per cuntribuc tl ciamp soziel, cunscidrei nia de basa. Per aiuc n cont de n cuatier vëniel damandà cin ani de residënza y de chisc trëi ani de lëur.

USP – L conservatorio de mujiga a Bulsan dëssa avëi na sëula direzion cun cater uniteies urganisatives. La Jonta provinziela à (ncuei) ai 24 de jené dat pro chësta partizion de urganisazion do che l conservatorio ‘Claudio Monteverdi’ de Bulsan ie ntant deventà avëi provinziel.

USP – La Jonta provinziela à numinà reprejentanc dla Provinzia de Bulsan per la cumiscion de candidatura dl Nordest Talia ala numinazion de capitela europea dla cultura per l ann 2019. La Jonta provinziela à numinà trëi persones, per la trëi grupes de rujeneda.