Atualità

USP – “La Jonta provinziela se à detlarà contra l culegamënt dl’autostreda Alemagna tres la Dolomites. - L bonus de cubatura puderan nce giapé sce l vën trat ju la vedla cësa. - Salvé i ciuleies dal vin a Girlan”. Chisc ie stai i argumënc prinzipei prejentei ncuei, 19 de lugio, tla cunferënza stampa riesc do la senteda dla Jonta provinziela de Bulsan.

USP – 31 chemuns dla Provinzia de Bulsan pieta nce ntan chësc instà la butëighes daviertes da sëira. L assessorat provinziel per l cumerz deberieda cun l’assoziazion per l cumerz, turism y servijes à nvià via nce chëst ann la scumenciadiva de suzes. Do Urtijëi, scumëncia ncuei (19 lugio) S. Crestina cun si program de “shopping” ntan la sëires da instà. N merdi ai 20 y pona n juebia ai 22 tenirà Sëlva y Corvara si prima sëires de program da sëira cun la butëighes daviertes.

USP – La Dolomites sciche arpejon mundiela UNESCO ie argumënt de na mostra de fotografies ala lergia che unirà giaurida a Al Plan de Mareo. L assessëur provinziel Michl Laimer deberieda cun l ambolt Albert Palfrader taierà n mierculdi 21 de lugio dala sies da sëira la vëta de chësta mostra.

USP – La terza edizion dla mostra artistica Trienala Ladina unirà giaurida n vënderdi che vën ai 23 de lugio dal presidënt dla Provinzia Luis Durnwalder y l’assessëura dl Tirol Beate Palfrader tl Museum Ladin. La Trienala da chëst ann ie dedicheda al argumënt “Tl museum per comuniché...”

USP – Ai 23 de lugio deura tl Museum Ladin la terza ediziun dla Trienala Ladina. Al concurs de chësta mostra à fat para 36 artisc che à dè jö sües idees tres espresciuns artistiches desfarëntes sciöche la pitöra, la grafica, la scoltöra, l’istalaziun o l’ert conzetuala. Peter Demetz de Sulé/Urtijëi é le su che à presentè na scoltöra de lëgn danter i sis artisc’ che à davagné le concurs.

USP – La Trienala Ladina, che é rovada a süa terza ediziun, é por le pröm iade gnüda daurida ince a artisc; di Grijuns. Esther Schena de Müstair alda pro i sis artisc che podarà mëte fora süa opera tl Museum Ladin. L’argomënt dl concurs por la Trienala Ladina da en chësc ann é “Tl museum por comuniché…”.

USP – La pruposta de lege sun i purtoies dai schi, n recurs per la merca „Suedtirol“ y la rujenedes sun la tofles di troies da mont ie stai trëi di argumënc de majer ntres tratei ncuei (12 lugio) dala Jonta provinziela y prejentei te cunferënza stampa.

USP – La sëires dl 15 y 16 de lugio ie dedichedes al palch tl Museum Ladin. L sarà da udëi l pez de teater „Ein Hamlet“ de Mauro Pescio. L se trata de n pez tla rujeneda taliana per jëuni y per granc.

USP – Al concurs por la terza ediziun dla Trienala Ladina à fat para 36 artisc dles valades ladines dles Dolomites, di Grijuns y dl Friul. Na iuria à chirì fora sis artisc che po mëte fora süa opera tl Museum Ladin; danter chisc él ince Veronica Zanoner de Moena. La mostra Trienala Ladina gnarà daurida ai 23 de lugio y restarà daverta feter trëi mëisc alalungia.

USP – La Ntendënza ala scola ladina fej al savëi che la suplënzes per l proscimo ann tla scoles ladines unirà sëurandata n vënderdi ai 6 de agost dala 9 danmesdì tla sënta dla Ntendënza, tla streda Binder a Bulsan.