Atualità

USP – L Ruf da Bula tl raion de Runcadic vën segurà da nuef. Davia che i parëies dl ruf ie vedli y à debujën de unì miurei, ie i lauranc dla Repartizion provinziela per l’eghes tl lëur de ne n fé de nueves. Te chësc cajo vëniel nce cialà di pësc tl Ruf da Bula.

USP – Chisc dis, ala fin de auril, uniral inò metù man cun i lëures per la streda nueva sota l Ciastelbadia. “Tl prim uniral jit inant cun i lëures danter l Col dl Ciastel y l Col tlamà Amtmannbühel, ulache l vën giavà ora y pona inò curì pro l tunel” dij l assessëur Florian Mussner. Nchin ala fin de mei dëssel nce unì stlut ju i lëures per seguré afrësc tl Ciastelbadia. L sistem de monitoring vën mo miurà.

USP – I dis de educazion politica pieta 144 manifestazion per fé cunëscer l lëur dl’educazion politica y per mutivé duc i zitadins a na culaburazion ativa. L program che à bele metù man n juebia, ie unì prejentà ncuei (24 auril) a Bulsan.

USP - L Ufize stampa dla Provinzia de Bulsan à mudernisà si plata internet tla rujeneda ladina. L servisc nuef per i media de rujeneda ladina y per duc i nteressei ie online da ncuei (23 auril) sota l’adres “provinzia.bz.it/uspl”. La comunicazion da pert l Guviern provinziel y di Servijes dla Provinzia de Bulsan vën fata cun comunicac stampa, video y ntervistes a usc, nce per ladin.

USP – Cun nvestizions, politica per l marcià dl lëur, mëter a desposizion scioldi, manco burocrazia y aiut te caji estremes juda la Provinzia de Bulsan a ti vester ala cunseguënzes dla crisa economica. Sun chësta streda ulël l Guviern provinziel stimulé l’economia da tlo y seguré la stieres. L presidënt Durnwalder y i assessëures à prejentà ncuei (23 auril) a Bulsan l pachetl de pruvedimënc.

USP – La Jonta provinziela à te si senteda da ncuei (20 auril) dat pro 500.000 Euro per judé la populazion tl Abruzzo, tucheda dal tremot. I pruvedimënc per judé la jënt dla Provinzia de Bulsan, tucheda dala crisa economica unirà prejentei te na cunferënza stampa n juebia danmesdì. Chësc à fat al savëi l presidënt dla Provinzia Luis Durnwalder, riesc do la senteda dal Jonta.

USP – Tl raion de Sterzing iel na lores ncantëur. Chësc vën fat al savëi dal Ufize provinziel per ciacia y pië pësc. Do la lores che à bonamënter passà l inviern sun l Jëuf Gampen, fossa chësta la segonda lores tl Südtirol. Aldò dla nfurmazions dl Ufize provinziel dëssel vester n tier speve che ne gauja nia gran problems.

USP – La cundizions acioche vëniel recunesciuda la figura prufesciunela de mediatëures culturei ie unides nviedes via n vënderdi (17 auril) tla cunferënza dla regions a Roma. “Chësc ie n var mpurtant de vies dl recunescimënt y nce n cont de valorisé chël che i mediatëures culturei fej per la ntegrazion tlo da nëus” dij l’assessëura provinziela Barbara Repetto.

USP – N mierculdi che vën, 22 de auril va n drova l bilanz provinziel y la lege finanziera per l ann 2009. L di dant, merdi, unirà tramedoi leges provinzieles publichedes tla plata ufiziela dla region. Nsci ie l bilanz provinziel ufizialisà cun 5,424 miliardes de Euro. “L ie n bilanz valivà ora cun nvestizions per na miliarda de Euro” à dit l assessëur la finanzes Barbara Repetto.

USP – A Bulsan ie ncuei (15 auril) unì prejentà la mostra interregiunela dal titul Labirint:Lidëza che giaurirà ai 9 de mei tla furtificazion de Furtëza (Franzensfeste). L se trata de na mostra metuda a jì dai trëi assessorac ala cultura dla Provinzia de Bulsan n culaburazion cun l Land Tirol y la Provinzia de Trënt.