Atualità

USP – De gran atualità ie ncuei l aiut da pert dl Südtirol per l Abruzzo tucà dal tremot. Erich Kostner de Badia giaterà ai prim de mei la uneranza „Stella al merito del lavoro“ a Bulsan, chësc à fat al savëi l presidënt dla Provinzia Luis Drunwalder ncuei (6 auril) do la senteda dla Jonta provinziela. I assessëures à ncuei nce rujenà dla Mobil Card, la mesures contra l meldefuech ti hotiei y la pitla scoles di luesc da mont.

USP – L plann de nseniamënt, la valutazions y la uneranza per sunadëures jëuni ie stai argumënc prinzipei dl’ancunteda di respunsabli dla defrënta grupes dla Scoles de Mujiga de dut Tirol. L’ancunteda ie chëst ann unida tenida a Sterzing.

USP – Chisc dis vëniel spartì ora tla scoles y scolines ladines l cudejel nuef di cursc de furmazion per nsenianc, educadëures y diretëures. Cun na vela de passa 50 cursc de furmazion persunela y furmazion te duta la materies de scola, vëniel tenì cont di bujëns y dla problematiches atueles. L cudejel ie unì dat ora per l 20° ann ndolauter.

USP – Laudes da pert cumpetënta à ncuei (2 auril) giapà l’Aministrazion provinziela n cont de co che ie unic adurvei i scioldi dla Union Europea. “Son drët cuntënc di programs dla Provinzia de Bulsan ajache i dà pëis ai chëi ciamps che ie nce de mpurtanza per l’Europa: inuvazion, energia y ambient” nsci la cumissera europea Danuta Hübner do l’ancunteda cun l Presidënt Luis Drunwalder.

USP – Tla scolina “Surëdl” te Sëlva ie ncuei danmesdì (2 auril) unit adalerch na delegazion de esperc pedagogics per mparé a cunëscer miec la maniera de lauré tla scolines ladines cun trëi rujenedes deberieda. I pedagoghes dala Franzia y dal Deutschland à abù gran stima per l servisc che l ti vën pità ai mëndri dla valedes ladines.

USP – Co ie pa unides a se l dé la Dolomites? Cie iel pa suzedù che se à furmà chisc crëps tan speziei y ce raport à pa la persona cun la Dolomites? Chëstes ie la dumandes a chëles che la mostra sun la Dolomites a Bulsan uel dé resposta. La giaurida tla cësa provinziela 11, tla streda Renon 4 a Bulsan unirà tenida duman juebia, 2 de auril.

USP – Te si prima senteda à Cunsulta ladina nueva ncuei domesdì (prim auril) udù dant manieres per smendrì la burocrazia ala lies cultureles tla valedes Ladines. “Chëi che se dà ju per la cultura ladina y fej ulentariat ne possa nia mo unì ciariei cun truep lëur burocratich, sën ie unì l mumënt de fé zeche per smendrì burocrazia” à dit l assessëur provinziel ladin Florian Mussner.

USP – Per la nueva streda de zircunvalazion de S.Crestina vëniel nchin ala fin de auril fat lëures de adatamënt tl raion Dorives. Ntan l’ena muessa l muvimënt sun streda fé cont de aspité pra n semafer.

USP – N Dumënia dl Ulif, ai 5 de auril gëura l Museum Ladin a S.Martin per la sajon da instà. La mostra speziela sun la ciampanes storiches possa mo unì vijiteda nchin ai 12 de auril.

USP – N juebia (2 auril) unirà na delegazion l’urganisazion "Pestalozzi - Fröbel" dal Deutschland y dala Franzia a vijité la scolines ladines cun trëi rujenedes. N se aspieta feter 30 persones danter educadëures de scolines y d’autra espertes y esperc de pedagogia infantila. Sun l program dl di iel na vijità ala scolina de Sëlva sciche ejëmpl per la 17 scolines ladines.