Atualità

USP – Jënt de tëmp sëura 70 ani possa tl Südtirol furné debant cun i mesuns de trasport publics. Da n auter ann inant iel de bujën de n abunamënt aldò, che n possa apusté tl dipartimënt provinziel per la mubilità. L ie unì mandà ora na lëtra a uni persona de tëmp cun l formuler per damandé l abunamënt, sce zachei ne l ëssa nia giapà, adrovel me da cherdé su.

USP – Per vester anjeniei a jì a lité ai 26 de utober, possen sën se cialé n facsimile dla zedula da lité tl internet sun la plates provinzieles. Sun la zedula iel i simboi dla chìndesc listes y cater risses per la stimes de preferënza.

USP – La crisa finanziera y si cunseguënzes sun l’economia tl Südtirol ie ncuei stat l’argumënt zentrel dla senteda dla Jonta provinziela de Bulsan. Do na prima descuscion sun i pruvedimënc da tò, aspieten che la banches, i fonds de pension y i partner soziei feje si cunsulënzes, dan fé vares cuncrec. Te Jonta provinziela iel mplu nce unì rujenà dla cuotes dl lat, la furmazion de dutores spezialisei y de mprësc per studënc.

USP – N prim cuntat cun nosta trëi rujenedes fej i mëndri majera pert tl juech, tres mujiga y stories. I trëi Istituc pedagogics dla Provinzia de Bulsan à dat ora n liber cun CD nuef che pieta na basa per chësc cuntat cun la trëi cultures te scolina. La publicazion “Miteinander – Insieme – Deboriada” vën prejenteda n juebia 16 de utober tla Scolina Salieta a Urtijëi.

La streda dla Val Badia (SS 244) unirà n lunesc sëira, 13 de utober sareda. Chësc vën fat al savëi dal assessorat provinziel per i lëures publics.

USP – Riesc sota Puntives, sun la streda danter Urtijëi y Pruca iel chisc dis unì scumencià n l lëur nuef de mantenimënt. Ntan i lëures che ie udui dant nchin ala fin de utober, vën l muvimënt di auti lascià passe cun n semafer.

USP – Per abiné culaburadëures che unissa ntan l inviern a lauré ti hotiei y tla ustaries à la repartizion provinziela per l lëur metù a jì deberieda cun la lia di osc’ HGV na borsa dl lëur pra l’Adria. La borsa metuda a jì a Lignano Sabbiadoro y per l prim iede nce a Grado à abù suzes.

USP – Feter duta la cunferënzes vën aldidancuei fates cun na prejentazion multimediela. Co che n possa prejenté cun suzes adurvan l program de computer “Powepoint”, vëniel nsenià da pert dl Ufize provinziel per media audiovisuei te n curs che scumëncia ai 21 de utober. La dumandes per l curs che ie debant, vën bele piedes do.

USP – Tl Istitut Ladin Micurà de Rü vëniel ncuei (mierculdi 8 de utober) prejentà l liber sun la cianties populeres tla valedes ladines dla Dolomites. L se trata de na documentazion de na nrescida scientifica, fata dan 100 ani. La prejentazion a San Martin de Tor scumëncia dala cich domesdì.

USP- Reprejentanc dla trëi grupes de rujeneda che lëura tl ciamp di jëuni ie, sun scumenciadiva di ufizies provinziei per jëuni stai a Oslo tla Norvegia, per mparé a cunëscer de plu manieres de cultura, sustëni, prevenzion y ntegrazion.