Atualità

Chisc dis él gnü fat n vare important por ci che reverda i laûrs de costruziun de n ater tòch dla strada dal Val Badia de gran importanza, y plü avisa dl tòch danter Punt de Fer y Pedraces. L’Assessorat ai laûrs publics ti à surandè i laûrs ala dita de costruziun Oberosler da San Laurënz che metarà man cun i laûrs da d’aisciöda dl 2006.

Les trëi Intendënzes scolastiches dla Provinzia deboriada cun i Istituc pedagogics di trëi grups linguistics mët a jì ai 16 y 17 de novëmber 2005 n convëgn sön le “Portfolio europeich di lingac”. Tl “Pavillon de Fleurs” a Maran s’incuntaràl n grup de porsones espertes da sis paîsc europeics che tratarà da n punt de odüda internazional l’argomënt “Vivere le lingue/Sprachen leben und erleben/Viver la rujenedes”.

Les domandes de contribuc provinziai por ativitês culturales, sostëgn artistich y ativitês de formaziun po gnì dades jö cina ai 31 de jenà 2006; le terminn di 10 de novëmber 2005 vel ma por la cultura todëscia y nia por chëra ladina.

N juebia ai 20 de utober uniràl tenì per l terzo iede tl Parkhotel Laurin a Bulsan l “di dla cultura ladina”. L travert de chësta scumenciadiva ie chël de traté tematiches che tóca da daujin la grupa de rujeneda ladina y che possa nce nteressé l’autra grupes linguistiches. L tema dl di dla cultura ladina de chëst ann reverda i toponims ladins y si regulamënc puscibli. L cunvëni porta l titul “Ladinische Ortsnamen – Welche Regelung?” y vën urganisà dal Assessorat per la cultura ladina.

N sada, ai 8 de utober, iel unit metù a jì l forum culturel a Urtijëi. L tema de chëst ann fova la leteratura ladina.

USP - Tl’ Europa vëgnel baié za. 200 lingac. Na gauja chësta por festejè chësta pluralité en le “Dé europeich di lingac” ai 26 de setëmber y por recordè l’importanza di lingac, a pié ia da chël dla uma. “Le lingaz dla uma é la fondamënta por düc i atri lingac. Tl lingaz dla uma virel mîc arcaics, liëndes y cunties, la storia y le pinsier de n popul”, scrî i assessurs ala scora Florian Mussner, Otto Saurer y l’assessuria Luisa Gnecchi.

I ombolc sciöche rapresentanc di comuns lità dala popolaziun é l’organism ofizial de rapresentanza di Ladins incër le grup dl Sela. Ai podarà s’incuntè autonomamënter te na Conferënza permanënta di ombolc ladins y por proiec te ciamps desvalis podarài se joè de assoziaziuns y istituziuns raionales. Chësc é ci che é gnü fat fora en lönesc, ai 19 de setëmber 2005 a Balsan pro na incuntada danter le Presidënt dla Provinzia Luis Durnwalder, so colegh trentin Lorenzo Dellai y le Presidënt dla Provinzia de Belun Sergio Reolon, l’assessur Florian Mussner y düc i 19 ombolc dles cinch valades ladines.

USP - En lönesc, ai 19 de setëmber 2005 a Balsan gnaràl baié dl organism de rapresentanza di Ladins incër le grup dl Sela. Le Presidënt dla Provinzia Luis Durnwalder à invié so colegh trentin Lorenzo Dellai y le Prësident dla Provinzia de Belun Sergio Reolon, l’assessur Florian Mussner sciöche ince düc i ombolc dles cinch valades ladines a se sentè adöm y rajonè sön chësc argomënt.

USP - Por le mëteman dl ann de scora nü gnaràl ince en chësc ann invié ia en vëndres, ai 9 de setëmber 2005 le Dé dla scora ladina a La Ila. I argomënc zentrai che gnarà tratà te chësta ocajiun é la scora ladina y sües particolaritês sciöche ince le percurs de formaziun y la cualité dla formaziun a livel nazional y internazional. Implü él ince sön le program n discurs da pert dl assessur por la scora Florian Mussner y dl intendënt Roland Verra.

USP - L’Istitut Cultural Ladin “Micurà de Rü” se dà jö cun le mantegnimënt y la promoziun dl lingaz y dla cultura ladina. Tignin cunt dles propostes dles assoziaziuns culturales de Gherdëna y dla Val Badia à la Junta provinziala nominé, en lönesc ai 29 d’agost 2005, le Consëi d’Istitut nü dl Istitut Cultural Ladin “Micurà de Rü”. “L’Istitut à na funziun determinanta no ma por le mantegnimënt mo ince por le svilup de nosta cultura ladina” à dit l’assessur Mussner.