Atualità

USP – Nsci sciche la ie stata pra la veles provinzieles d’autonn ie la nfurmazions y i resultac dla veles dl Parlamënt dl’Europa da pudëi liejer do tla plates provinzieles tl internet www.provinz.bz.it. La coordinazion de chësc servisc vën nce chëst iede cureda dala Südtiroler Informatik AG.

USP – Bel adrët per la feries porta l’ultima edizion dla zaita de scola „Orange Juice“, dla scola auta Raetia de Urtijei, nuvieteis per sculeies, nsenianc y genitores. Ora de na majera ntervista cun l Presidënt dla Provinzia Durnwalder, iel nce da lierjer d’uni sort de articuli sun sport, proiec de scola y argumënc di jëuni te cin rujenedes.

USP – La streda dla Val Badia ie n sada y dumënia, 12 y 13 de juni 2004, ntan l di nce davierta ai auti y la curieres.

USP – N bel instà y de bela feries mbincia i trëi assessëures ala scoles Florian Mussner, Luisa Gnecchi y Otto Saurer a duc i mpeniëi tla scoles te si tëuta de posizion per la fin dl ann de scola. Te chësta ucajion vëniel nce fat vel riflescion sun l svilup dla scola tl Südtirol.

USP – Da ncuei 9 de juni vel na regluamentazion nueva n cont de dé jù contes y notes d’unorar per prestazions de dutores spezialisei o dutores dai dënz ai Servijes saniteresc. La Jonta Provinziela à da permò adatà l tëmp te chël che n muessa de jù chësta contes a l tëmp udù dant te caji sce n muessa sté plu dis te n spedel. Per duta la prestazions privates vel da sën inant n tëmp de siesc mëns per dé ite la conta.

USP – La Sgonda cumiscion per la defendura dl’ambient à ncuei, merdi 8 de juni tëut tres ndut 18 proiec. Danter i proiec che à giapà l bënsté dala cumiscion cun si presidënt Adriano Oggiano iel nce la utia da mont sun Fodara Vedla y l Lech de Sompunt tla Val Badia.

USP – La regulamentazion per furné sun Mont Sëuc, da Sëuc sù, dëssa ji inant cun vel pitla mudazion ntan la sajon da instà. Nsci iel ncuei lunesc, 7 de juni, unì fat ora dala Jonta Provinziela. De autonn ulëssen to na decijion sun la ntroduzion de n daz y de n servisc de curieres a miëur marcià. Chësc ie stat l argumënt zetrel dla senteda da ncuei.

USP – Cater mplanc da lavé taieresc, 500 taieresc cun goc y l pestech ie unci njeniei dal Ufize provinziel per l refudam per manifestazions cun festes y partys. A chësta maniera dëssel unì sparanià 80 percënt dl refudam. L assessëur Laimer cun l diretëur de dipartimënt Huber, l diretëur dl Ufize provinziel per l refudam Angelucci y i rapresentanc di Servijes dla Zità de Persenon à ncuei vënderdi presentà l’azion „Festa zënza refudam“.

USP – La streda dla Val Badia vën n sada y dumënia 5 y 6 de juni 2004 giaurida ai auti y meusuns pesoc ntan l di, nscìie udù dant dala urdenanza dl assessëur ala stredes Florian Mussner.

USP – La ntreda nueva dla pitla zità de Tluses a nord ie ncuei juebia, 3 de juni, unida giaurida ufizialmënter dal Presidënt dla Provinzia Durnwalder y l assessëur per lëures publics Mussner. Tres l ncrëusc che à custà 1,8 milions de Euro iel sën mesun raidé de viers de Bulsan canche n vën ora de zità a nord de Tluses.