Atualità

Cëst’ ena che vën, dai 7 nchin ai 11 de juni 2004 tën l’aucat populer de plu udienzes.

USP – Per i ufizes de suneria y pra l Cumisariat de Guviern iel unì scrit ora ndut 26 stieres. L ultim di per fé dumanda per chësta stieres ie l 23 de juni 2004.

USP – Per la ripartizion dl nfurmatica dla Provinzia de Bulsan vëniel crì n diretëur nuef.

De auril 2004 iel unì cumpedà n aumënt de 0,4% pra i turisc’ che ie unic adalerch. Permez al medem mëns dl ann passà iel nce stat 2,0% deplù nuetes afitedes. Ntan dut l inviern 2003/04 iel permez al ann dant unì arjont n aumënt de 6,5% pra i turisc’ che ie unic adalerch y de 4,6% pra la nuetes afitedes. L redord de 9,7 milion de nuetes afitedes tl Südtirol ntan l inviern dal ann passà, ie chëst ann unì miurà, ruvan a passa 10 milion.

USP – Da permó àla Jonta provinziela numinà la consulta nueva per l’ativiteies alpines. Presidënt nuef de chësta consulta che à l duvier de dé cunsëies ala Jonta tl ciamp alpinistich y dl aiut ti crëps, ie l assessëur Thomas Widmann. Othmar Prinoth ie rapresentant nuef di Mëinacrëp y Mëinaschi.

USP – De 22 proiec che la Sgonda cumiscion per la defendura dl’ambient à tëut tres te si senteda de chëst’ ena, à 20 proiec giapà l bënsté. Danter chisc nce chël dla utia da mont sun Piz Setëur sëura Plan de Gralba, tl Chemun de Sëlva y de na streda per chëi dai schi tl chemun de Valdaura. La cumiscion ti à nce cialà al proiet per adatamënc al purtoi de Copa dl mond Gran Risa a La Ila.

USP – La frabiches dla scoles, la riforma scolastica nueva y cuestions de personal dla Scola ladina ie stai i argumënc dl’ancunteda de ncuei mierculdi, 26 de mei, danter l presidënt Durnwalder y l assessëur Mussner cun i rapresentanc dla Scola ladina.

USP – Per giapé n’azetanza definitiva de „proiec ESF“, proiec de furmazion sustenì dal Fond soziel europeich, iel dant debujën di ejaminé plu avisa. La dumandes per l ejaminazions che vën scumëncedes de juni, muessa unides dates jù nchin an n vënderdi de chëst’ ena, ai 28 de mei tl Ufize provinziel „ESF“.

USP – 22 ulenteres fej da d’ansciuda 2003 l curs „Cualificazion dl lëur de furmazion ti luesc“, metù a jì dal Ufize provinziel per la furmazion. Da permó à l assessëura per la cultura, Sabina Kasslatter Mur pudú sëurandé tla calonia de Bulsan l atestat de avëi fat chësta furmazion.

USP – „La cultura ladina dëssa unì mantenida y giapé lerch per se svilupé inant – tl medem mumënt iel nce debujën de sustenì l barat cun d’autra cultures dl Südtirol y dl’Europa“. Chësc ie l pensier che l assessëur ladin Florian Mussnser porta dant n ucajion dl di mundiel per l svilup culturel de duman, numinà dala UNESCO.