Atualità

Da n struf possen sun la homepage dl istitut provinziel de statistica (ASTAT) se nuzé de doi servijes online. Tres computer iel mesun fe ora l cont dl aumënt di fic de dërt sun de plu somes y sun de plu tëmps. Coche n possa se nuzé dl servisc dla statistica dl priesc y coche n possa cialé do la mesura dl’inflazion, ie dut da udei stota l’adres internet http://www.provinz.bz.it/astat/indices/indices_d.asp

OSP – La ncëira per fé l puent „Cor“ y per miuré la streda tres la Val Badia ie unida sëurandata n merdi tres n cuncors tl ufize per frabiches a Bulsan. A vëncer chësc cunsors iel stata la firma dla Val Badia „Impianti Colfosco“.

OSP – Ncuei (merdi ai 16) iel unì batù tres l sgondo tunel dla streda neuva dla bassa Val Badia. Cun l ruvé tres dl „tunel nr. 5“ an arjont n bel var di lëures. lëures per la streda nueva che vëija dant cin tuniei nueves, y che va inant drët bën.

OSP – Nchin ai 31 de utober an nce chëst ann la puscibltà de fé la pruposta de lauranc, dependënc y respunsabli per la stëila de merit al lëur. L’uneranza unirà fata sciche uni ann n l di dl lëur ai prim de mei 2004.

L istitut provinziel de statistica (ASTAT) a njenià n culaburazion cun l ufize per la furnadoies, na publicazion nueva sun la furnadoies tl Südtirol 2002. L se trata de na colezion de nfurmazions sun la strutures dla furnadoies, sun la cunzessions dla furnadoies y dla bilanzes.

OSP – Ora per la cresta danter i chemuns del Mareo y Ampëz passa la ferata dal inuem simbolich „Tru dla Pesc“. Chësta via unirà giaurida n dumënia ai 14 de setëmber 2003 tl cërtl de na pitla festa pra la utia Gran Fanes. Duc i nteressei avrà n dumënia nce l’ucajion de fé la via fereda cumpaniei da n mëinacrëp. Per chësta ucajion val debujën de se lascé nuté su nchin a n vënderdi ai 12 de setëmber.

OSP – Cun cuntribuc de ressanamënt de 464.000 Euro sustën l assessorat per artejanat, cumerz y tuism l mantenimënt de troies y uties da mont tl Südtirol. A usufrì de chisc cuntribuc ie la lies da mont AVS y CAI. Chësc iel unì dat pro n dal guviërn provinziel sun pruposta l assessëur cumpetënt.

OSP – Nfurmazions de utl sun la frumazion profesciunela de rujeneda ladina y tudëscia vën presentedes da n sada, 13 de setëmber 2003 sun l stond dla ripartizion per la frumazion profesciunela ladina y tudëscia dla 56esma fiera nternaziunela da d’autonn a Bulsan. Tl zënter dla presentazion sarà la scoles profesciuneles cun si vela de ufertes defrëntes. Sun l program iel pona nce de plu uneranzes per cursc dla frumazion profesciunela ladina y tudëscia. Ai 21 se presenta la scola profesciunela per l atejanat artistich de Gherdëina.

OSP - „L forum per lëures publcs“ à n lunesc ai 8 de setëmber a Bulsan metù man cun si lëur. L cumité de 22 persones tën n cuntrol sun i lëures publics tl Südtirol, porta prupostes y pusciblteies de miuramënc, y fej nce la nterpretazion dla normatives che vën metudes dant. Pra la senteda de n lunesc iel unì dat pro l regulamënt intern che mostra su avisa la cumpetënzes.

OSP – Cun gran maruëia à l assessorat per la scola y cultura ladina tëut a cunescënza che tres i media ti iel unì trat dant che l ne ti uniss’ nia dat n cuntribut culturel a n media ladin nce sce l ie n bensté de l dé da pert dla consulta ladina. L assessorat provinziel lecorda che l bensté dla consulta ladina ne ie nia ublient, che l guviern provinziel tol la decijions sun i cuntribuc provinziei y che la dumandes possa nce unides cialedes do plu avisa.