Atualità

OSP – L resta me plu puecia enes de tëmp per i sculeies dla scoles d’ert y scoles secunderes dl II. livel per dé jù la dumandes de cuntribuc ala Provizia per l ann de scola 2003/04. L ultim di sarà juebia ai 2 de utober 2003. La dumandes possa unides dates jù te scola o tl ufize provinziel per sustëni scolastich.

OSP - Cun l Di dla Scola Ladina a S.Lenert de Badia à n vënderdi, 5 de setëmber metù man l ann de scola nuef per respunsabli, nsenianc, y culaburadëures dla scoles ladines. L assessëur per la scola y cultura ladina Florian Mussner à purtà dant nuviteies tl ciamp dla scola, ti à dat esprescion ala stima per l lëur di culaburadëures tla scola y ti mbincian truepa forzes per l ann nuef. Do la rujenedes dl ntendënt ala scola ladina Roland Verra, à l prof. Franco Frabboni purtà dant n referat.

OSP – Per la presënza tl internet de fitamajons dl Südtirol iel mo da giapé n sustëni dala Provinzia de Bulsan. L’azion dl assessorat per artejanat, cumerz y turism de sustenì la presënza tl internet de fitamajons à bele abù suzes y vën sën mo slungeda nchin ala fin dl ann. “L’azion internet dëssa ti judé ai fitamajons privac de fé l var tla re mundiela y ti judé a se presenté a na maniera moderna” sorissea l assessëur al cumerz Werner Frick.

OSP – I unicac fai tl lën dla nona fiera dla scultura “Unika” a Runcadic ie da udëi da n juebia ai 4 de setëmber dala 18.00 inant canche l unirà tenì la giaurida cun la presënza dl presidënt Luis Durnwalder, l assessëur per l artejanat Werner Frick y i rapresentanc di artejans. Feter 30 artisc mët ora si lëures fai esclusivamënter a man, che sarà da udëi nchin a n dumënia 7 de setëmber tl zënter dal tennis trasfurmà te na berstot d’ert.

OSP - Le punt prigorus y strënt tl raiun de Punt de Fer dan Pedraces ne esistarà nia plü di. Te chësta zona passarà la strada provinziala fora por n tunel tl crëp y spo sura n punt nü fora. En lönesc, ai 1 de setëmber à l´Assessur ai laûrs publics Florian Mussner presentè le proiet da 8,4 miliuns de euro a Pedraces.

OSP – La lista di priejes indicatives per i lëures de costruzion de stredes, purtà dant dal assessëur ai lëures publics Florian Mussner y data pro dala jonta provinziela ie sën da udëi sun la plates provinzieles tl internet.

OSP – L assessëur ai lëures publics Florian Mussner ti a sëurandat n lunesc ai prim de setëmber i lëures per l ncrëusc danter la streda de zicunvalazion y la stredes de azes a San Ciascian ala firma Schiavo. L ncrëusc nuef dëssa unì fat te set mënsc y custerà 568.697 Euro.

OSP – La scola ladina y si particulariteies sarà n vënderdi ai 5 de setëmber 2003 l argumënt zentrel dl cunvëni a S. Lenert de Badia. L assessëur ala scola y cultura ladina Florian Mussner rujenerà ala maestres, ai maestri y ala persones respunsables dla scola.

OSP - N lunesc ai prim de setëmber 2003 iel doi ancutedes mpurtantes per i lëures sun la stredes dla Val Badia. L assessëur ai lëures publics Florian Mussner sëurandajerà do marënda i lëures per l ncrëusc danter la streda de zircunvalazion y la streda de azes a San Ciascian. A Badia presenteral l proiet per seguré la streda tl raion de Punt de fer dessot a Pedraces.

OSP – la figura dl “fì pentì”, che ie stata argumënt de plu discuscions unirà spusteda dal verzon di Capuziner ala scola profesciunela per lëures soziei "Hannah Arendt". Chësc ie uni fat ora dal Assessëur Florian Mussner pra n sëuraluech cun rapresentanc di Capuziner y cun l diretëur dla scola profesciunela per lëures soziei de Bulsan. L assessëur à bele dat la nceria per chësc spustamënt. La figura che rapresentea n ël desnut, dëssa aldo di media avëi purtà gran sdëni pra i patri. L assessëur Mussner à dat esprescion de gran stima per i Capuziner y ne ulëssa nia che i se sënte ufendui per via dl’opera d’ert.