Atualità
Seires de informazion per genitori sun la reform dla scola
USP - La scola ladina sperimenterà n l ann de scola che vën 2005/06 la reforma scolastica. L Assessëur per la scoles ladines Florian Mussner, l Intendënt dla scoles Roland Verra y l Diretëur de Repartizion Alexander Prinoth à prejentà la inuvazions chëst’ena a Urtijëi y a La Ila. “Laureron inant cun l sistem paritetich” à sotrissà l Assessëur Mussner. Ala sëires de nfurmazion à partezipà truep zitadins y truepa zitadines partezipan ala discuscion sun l svilup dla scola ladina.
Ai 4 d’auril 2005 iel stat a Urtijei tla Aula Magna dla Scola Elementera y ai 5.4.5 tl gran salf dla Scola Mesana a La Ila seires de informazion sun la reform dla scola per genitori, metudes a jì dal Cumité Provinziel Ladin di Genitori.A purté dant la informazions plu nueves sun l prozes de reform a livel naziunel y provinziel iel stat l Assesseur Mussner, l Intendent Verra y l Direteur de Ripartizion Prinoth.
La partezipazion di genitori ie stata dret bona sibe a Urtijei che nce a La Ila, seni che l argument nteressea dassen la jent.
L ie stat ancuntedes ntressantes, ajache l clima de discuscion fova daviert y la populazion à desmustrà che l scola ti sta bendebò a cuer.
L Assesseur Mussner à sorissà che la scola ladina dëssa lauré inant te si sistem paritetich che à arjont de bon resultac. Da pert dla scola ladina iel la ulentà de jì ite tla reform cun spirt costrutif y cun creta, zenza se lascé sprigulé ju dala nuviteies y dal majer leur che les cumporta. La reform purterà nce a na revalutazion dla funzion di organns collegiai y dla partezipazion di genitori, à dit l Assesseur.
L Intendent à purtà dant i aspec pedagogics y urganisatifs dla reforma, che unirà aplicheda bele tl ann de scola che vën te duta la scoles elementeres Dla Val Badia y de Gherdëina. Per la scola mesana messeran aspité l ann de scola 2006/07. Danter la nuviteies plu mpurtantes iel da auzé ora la materies opzioneles, l ingleisc tla cuarta y cuinta elementera, l portfolio dla cumpetënzes y la funzion tutoriela da seguré a duc i sculeies.
Prinoth ie jit ite tl detail dl cheder orar y tla pertes strutureles dla reforma, che cumporta n gran sforz urganisatif per la Intendënza Ladina y per duta la Direzions.
Per chël che reverda la reforma tla scoles autes, saral mo da aspité, ajache nce a livel naziunel ne iesen mo nia njiniei cun l decret legislatif aldò.
Truepa dumandes di genitors à tucà la cunseguenzes dla reforma per si mutons, dantaldut la urganisazion dl orar, i trasporc, l servij mensa y la ressurses che ie da garat per mëter ndrova la reforma.
Dut adum possen dì che l Cumité Provinziel di Genitori Ladins à dat cun chësta scumenciadives de nfurmazion n cuntribut costrutif per mëter a jì l prozes de reforma, te n spirt de culaburazion y de cunfront daviert.
USP
