Atualità
Dezijiuns dla IIª Comisciun provinziala por la sconanza dla contrada
USP - Chësta edema à la IIª Comisciun provinziala por la sconanza dla contrada cun a ce Adriano Oggiano valuté indöt 25 proiec danter chisc ince na ligna de interesc privac. La Comisciun à dè so bëgnstè por la conformaziun dl terac tres spostamënc de material sön pistes ti comuns da Corvara y Badia.
Aladô dl bëgnstè dla IIª Comisciun provinziala por la sconanza dla contrada pol gnì lascè jö material sön la pista “Codes” a San Ćiascian. A chësta manira po la pista gnì modelada atramënter. Le tòch de spersa mëss dedô indô gnì inverdì à splighé le presidënt dla Comisciun Oggiano. La sozieté „Grandi funivie Alta Badia“ che à menè ite le proiet mëss dè jö na cauziun de 5000 euro. Presciapüch 2000 metri cubich de material dess gnì lascià jö sön na spersa de 0,4 hectars. La pista ne po nia gnì alzada de plü de mez meter.I spostamënć de material pro la pista “Sodlisa” tl comun da Corvara sarà majeri. Indöt pol gnì lascè jö bëgn 4700 metri cubich de material, à fat fora la IIª Comisciun provinziala por la sconanza dla contrada. Le tòch de spersa che vëgn arjigné ca danü é de n hectar. Na prescriziun dada dant dala Comisciun reverda l’altëza dl material lascè jö: chësta ne po nia jì sura dui metri fora. Implü mëss döta la spersa gnì inverdida do che i laûrs é gnü stlüć jö. Ala sozieté „Impianti Colfosco“ che à presentè le proiet ti él gnü damanè na cauziun de 7000 euro.
USP
