Atualità

Desvalì | 24.05.2005 | 16:46

L’assessur Mussner pro n convëgn dles mendranzes a Gorizia

LPA - Pro n convëgn dles mendranzes d’Europa sot al moto „Partnership of diversity“ tignì a Gorizia sön le confin danter la Talia y la Slovenia éra jüda dl valur ajuntè di lingac de mendranza te düc i seturs, dal’aministraziun al ciamp dla formaziun y dl’istruziun, dai massmedia al setur dl turism. L’assessur Florian Mussner à portè dant la situaziun te Südtirol.

Pro le convëgn à rapresentanć de mendranzes desvalies sciöche i aostans, i bascs, i catalans, i irlandeji, i lapons y d’atri descrit süa situaziun atuala y s’à dè jö cun la chestiun dl mantegnimënt di lingac de mendranza. A öna ê düć cun le fat che ma sc’al vëgn ofizialmënter adorè i lingac de mendranza ti seturs desvalis spo podarài suravire. L’assessur Mussner à baié dla situaziun de Südtirol dantadöt dla mendranza tla mendranza, di ladins. Cun sodesfaziun àl podü ti lascè al savëi ai presënć che le ladin te Südtirol vëgn reconesciü sciöche lingaz ofizial, ch’al vëgn adorè tl’aministraziun publica y insigné te scora sciöche materia d’insegnamënt. “Chësc é le resultat di sforc y dl impëgn durà agn alalungia de n gran numer de porsones che à odü ite che ma cun l’adoranza dl lingaz dla uma pol inće gnì respetè l’identité de n popul” à dit l’assessur. Mussner é inće jü ite sön l’importanza dla cultura ladina y dl lingaz ladin sot al aspet turistich. “Le ladin, tan bëgn la cultura co le lingaz é sciöche n magnet por nüsc turisć che mostra n gran interès por nosta tradiziun y por nostes usanzes” s’à tut à dì l’assessur. Mussner à sambëgn inće fat referimënt ala presënza dl ladin ti media alzan fora y laldan la trasmisciun TRAIL y le foliet “La Usc di Ladins”. Plü dërć che na mendranza arjunje y plü valur che le lingaz de mendranza ciafa nia ma por chi che le baia mo inće por i lingac vijins, à afermè i rapresentanć dles mendranzes. Al é de gran importanza che les porsones responsables dla politica sostëgnes le svilup di lingac de mendranza a düć i livì deache ma tla liberté dl lingaz resta l’identité dla porsona inviolada. Plü dessigü gnarà le proscimo convëgn dles mendranzes sot al moto “Partnership of diveristy” tignì te Südtirol y chësc ti à fat plajëi al assessur Mussner. En chësc ann él gnü chirì fora Gorizia sciöche cité por chësta manifestaziun: ilò vîrel pö mendranzes todësces y inće slovenes. Le convëgn é gnü organisé dala Provinzia de Gorizia y dala Regiun Friuli Venezia Giulia en colaboraziun cun l’assoziaziun “Confamily” (rapresentanza dl Eblul tla Talia)

USP

Galaria dales fotografies