Atualità

Desvalì | 24.08.2005 | 16:40

Provinzia y Comuns arjunj na acordanza sön le puzenè les scolines

USP - L’assessur al personal Thomas Widmann, l’assessuria ala scora taliana Luisa Gnecchi, l’assessur ala scora todëscia Otto Saurer y l’assessur ala scora ladina Florian Mussner à arjunt inier na acordanza cun le Consorz di Comuns por ci che reverda le laûr da puzenè les scolines. Les colaboradësses pedagogiches ne puzenëia nia plü da sëgn inant cun le contrat nü. Le Provinzia mëss aumenté la cuota di cosc’ de gestiun dles scolines che ara ti dà anualmënter ai Comuns, él gnü dit dala sentada. I Comuns mëss organisé le laûr da puzenè.

Le tru de cualifiché damì le personal dles scolines, sides les maestres sciöche ince les assistëntes é dërt y se vëgn damanè dal tëmp te chël ch’i viun, cun tres na majera valutaziun dl tëmp por l’imparè danter i 3 y i 6 agn. Sön chësc é sta düc i rapresentanc politics a öna. I cosc’ che vëgn a se le dè implü é iustificà sce le tëmp davagné ti va a bëgn di mituns y dles mitans. L’assessur Saurer à ciafè l’inciaria da portè inant tla Junta provinziala la ghiranza de n aumënt di cosc’ de gestiun che la Provinzia paia vigni ann ai Comuns. La lege provinziala che regolamentëia la scolina scrî dant le 50%, deperpo che la Provinzia paia ma fora atualmënter danter le 13 % y le 17%, sciöche i rapresentanc’ di Comuns à fat fora le cunt. “Chësta retüda dles spëises por n sorvisc deleghé dala Provinzia ai Comuns mëss gnì aumentada de na perzentuala azetabla dai Comuns”, é stada l’acordanza tuta do passa 2 ores de discusciun. Porchël l’impëgn dl assessur Saurer de portè dant cun le sostëgn di colegs Mussner, Gnecchi y Widmann presënc’ al’incuntada la ghiranza de n aumënt por le bilanz de previjiun 2006. Le Consorz di Comuns inviarà düc’ i Comuns da orgnisé por le scomenciaënt dl ann de scolina le sorvisc dl puzenè. “I sun dër cuntënt che al é gnü odü ite da dötes les perts l’importanza dl contrat nü por le personal dla scolina che vëiga danfora titui de stüde plü alc’ sides por les maestres co por les colaboradësses pedagogiches. Chësc contrat ti comporta cosc’ de personal plü alc’ ala Provinzia, mo al é n investiziun tla formaziun. Porchël é le contrat ince gnü deliberé al’unanimité dala Junta Provinziala. Ince l’assessur Mussner à sotrissé l’importanza de na buna cualificaziun dl personal dla scolina a bëgn di pici mituns. “Mo i cosc’ implü ne dess nia gnì messü paià dales families, eventualmënter por na picera pert olache ara ne va nia atramënter”, é stada la conclujiun dla incuntada.

USP

Galaria dales fotografies