Atualità
Raiun schiistich Gherdëna: la secunda comisciun dla sconanza dl ambiënt aprovëia inovaziuns
LPA – Plü saurides gnarà fates döes pistes tl comun de Sëlva. Ara se trata dla pista de Ciampinoi y tla Val Longia. La secunda comisciun dla sconanza dl ambiënt à aprovè inier (dedolönesc, ai 3 de otober) i proieć presentà dales sozietês de furnadoies competëntes.
La pista de Ciampinoi dess gnì arjignada ca y adatada por i schiadus che ne sa nia ćiamò dër da jì cun i schi. La sozieté dl lift ó porchël lié la staziun a munt cun la pista manco ërta che é sön la pert cuntra vest. Al è preodü la costruziun de n tru dai schi. La secunda comisciun dla sconanza dl ambiënt à inier en ligna de prinzip, aprovè le proiet portè dant dala sozieté funzionara furnadoies Saslonch, don da intëne che la larghëza dla pista po gnì strënta alplü de cin’metri. La comisciun de sconanza dl ambiënt à stabilì regoles prezises y à ghiré na cauziun de 20.000€. I laûrs po gnì destrigà te döes fases.Te Val ó la sozieté azionara de furnadoies Danterceppies fà la pista “Vallunga” plü saurida. La pista gnarà aplanada te dui posć. Chësc comporta n movimënt dla tera te na mosöra de 4.500 metri cubics. Implü mëssel gnì taié jö n valügn lëgns sot ala suravidlanza di verdabosh. Chëstes mudaziuns dles pistes che é gnüdes aprovades dai ofizi sconanza dl ambiënt, é bele gnüs portà ite tl plann dles pistes y tl plann urbanistich de comun. Tla valutaziun dl proiet à la secunda comisciun dla sconanza dl ambiënt scrit dant l’impradimënt y na cauziun de 15.000 €.
Löm vërda à inće ciafè le proiet de varianta dl lift da scagns cun cater posć “Sochers”, che vëgn manajè dala sozieté funzionara furnadoies Saslonch. Ara se trata dla costruziun deforaìa dla staziun a munt nöia. La secunda comisciun dla sconanza dl ambiënt à proponü na tafladöra de lëgn y à aconsintì la proposta dla sozieté de lascè le parëi cun l’inom dl lift, de petun. Inće te chësc caje él gnü scrit dant mosöres d’impradimënt.
USP
