Atualità
Le ladin Gustav Mischi diretur nü dl Ofize tecnich Strades nord-ost
Da n valgönes edemes é Gustav Mischi da Longiarü tla Val Badia gnü nominé diretur dl Ofize tecnich Strades nord-ost dl Departimënt por i laûrs publics dla Provinzia. L’Assessur por i laûrs publics Florian Mussner é dër contënt ch’al é stè n ladin a davagné le concurs por le post de diretur d’ofize.
"Cun Mischi unse ciafè n diretur competënt te düć i seturs dles costruziuns dles strades", se ralegrëia l’Assessur Florian Mussner. Mischi ne n’à nia mâ de bones conescënzes tl setur tecnich, mo al à inće na bona formaziun por ći che reverda le management che é fondamental por n post de diretur y la mediaziun che é inće bëgnodüda te chësc laûr sc’an conscidra che tl Departimënt por i laûrs publics él tres indô debojëgn de stabilì n consëns danter i convijins y i aministradus. Da n diretur ne s’aspetun nia mâ na bona formaziun tla materia mo dantadöt la capazité de stabilì de bugn raporć cun i colauradus y la jënt che à da fà cun l’ativité dl ofize, dij l’Assessur. Mischi à desmostrè d’avëi chësta capazité.Mischi é nasciü tl 1972 a Longiarü y dal 1998 inant laorel tl Ofize tecnich Strades nord-ost. Do i stüdi de ingenieria zivila a Padua àl frecuentè a Salzburg n master sön l’aministraziun publica y le management publich. Al à davagné le concurs por le post de diretur dl Ofize tecnich Strades nord-ost. Chësc ofize provinzial coordinëia i laûrs publics nüs, i laûrs y le ressanamënt de strades, tunei y punć tla Val d’Isarch y tla Val de Puster. L’Ofize é inće responsabl dla gestiun de proieć, dla proietaziun, dl’assegnaziun de inćiaries de rejia, dla direziun de laûrs y dl ejam de colaudaziun de proieć dl setur dles strades tla Val d’Isarch y de Puster.
USP
