Atualità
Comitê che reverda plö grups linguistics: Por le pröm iade les domandes tratades bel de jenà
USP - L’ Assesur ladin Florian Mussner á chërde ite ai 9 de jenà na sentada dl Comitê de coordinaziun por manifestaziuns culturales o artistiches che reverda plö grups linguistics. Tl zënter dla discusciun i programs culturai por l’ann 2008. Por le pröm iade à le comitê metü a desposiziun i contribuc culturai por les lies bel de jenà, incër 700.000 euro.
L Comitê de coordinaziun che reverda plö grups linguistics à tratè les domandes de contribuć de lies y organisaziuns, che à podü les dè jö bel de dezëmber. « Un tratè les domandes de ca. 20 lies l plö snel poscibl, por ti dè la poscibilitè de programè plö saurì l ativité por düt l’ann», dij l’Assessur Mussner, che à la presidënza de chësc gremium. N’atenziun particolara ti el gnü dè a chëles manifestaziuns y iniziatives che à tignì cunt dl gran avenimënt Manifesta 2008, programè por chëst ann te Südtirol. « Iniziatives culturales che tol ite plö grups linguistics rapresënta n momënt de dialog y de confrontaziun y daida la convivënza te Südtirol », inscö l’Assessur Mussner. “ I proieć fać deboriada aumënta la comprenjiun por les atres cultures y promöi la toleranza“ dij l’Assessur Mussner y injunta che, “la colaboraziun danter lies, organisaziuns y les Ripartiziuns dla Provinzia cheriëia inće sinergies, che po gnì spo sfrutades tl ćiamp dla cultura».
L Comitê de coordinaziun por manifestaziuns culturales o artistiches che reverda plö grups linguistics é gnü metü sö tl 1958. Al se da jö cun iniziatives, che é d’interès por düc trëi i grups linguistics te Südtirol. L Comitê da jö arać porsura la conzesciun de contribuć, che vëgn spo cozedüs dal Govern Provinzial. Incer 20 lies á fat domanda por n contribut y l Comitê à de jö arać por zirca 700.000 euro.
L’Assessur ladin Florian Mussner à la presidënza de chësc Comitê. Sambëgn fej inće pert de chësc gremium l’Assesuria ala Cultura tudëscia Sabina Kasslatter Mur y L’Assessur ala Cultura taliana Luigi Cigolla schöche esperć ti ćiamps dla cultura.
USP
