Atualità
Prejentà l manual “nvestimënc cun respunsabltà”
USP – Tla gran batalia per i scioldi sun l marcià di nvestimënc tl Südtirol ie la banches, la assegurazions y i aministradëures de fonds drët creatives. Per chëi che ne ulëssa nia ji sot tla gran vela y mantenì na sëuravijion pieta la Provinzia de Bulsan y la Zentrela de Consumadëures n manual dal titul "Verantwortlich anlegen"- "Saper investire".
La populazion dl Südtirol à sparanià de ndut 7800 milion de Euro. “Sce n tol ca i sparanies di privac ruven a na media de 10.000 Euro per persona” nscì l presidënt Durnwalder pra la prejentazion dl pitl liber. Tl medemo mumënt ruva nce a lum n debit n media de 31.000 Euro per familia. Chësc pëis vën a se l dé dantaprima tres nvestimënc per l cuatier.
Per chëi che ie boni de mëter sun na pert scioldi y che se damanda co che i dëssa fé i nvestimënc, iel de mpurtanza che i giape la nfurmazions per to na decijion razionela, nscì Durnwalder. Davia che feter deguni ne se tol dl’aurela de se crì ora nstës la nfurmazions, iel sën unì dat ora n liber per tudësch y talian. “Chësta publicazion dëssa svilupé l potenzial critich de chëi che sparania per se damandé de bon prudoc finanzieres” nscì l fin prinzipel per l diretëur dla Zëntrela di Consumadëures Walther Andreaus.
L liber prejënta y spiega duc i aspec di nvestimënc finanzieres. L vën analisà la formes de davani y de sparani, y pona nce la strategies y i fins dl nvestimënt. Nfurmazions vëniel sëuraprò nce dat sun formes de paiamënt, prudoc dl sparani, l se defënder dala nflazion, mpresté su scioldi, la pension, cumpré l cuatier, rendites y risich de prudoc finanzieres.
Chi che ne à chisc dis nia bele giapà l liber tres posta possa se l damandé debant dala Provinzia o dala Zëntrela di Consmadëures a Bulsan.
AS
