Atualità
L zënter Sozial a Pidrò ie daviert
USP - Cun la giaurida dl zënter soziel nuef a Pidrò à la populazion dla Val Badia n servisc ntier n cont dla strutures residenzieles sozieles. N sada ai 17 de mei iel unì tenì la giaurida ufiziela cun truepa autoriteies, danter chëstes nce l presidënt dla provinzia Durnwalder, l assessëur Mussner y l ambolt Complojer.
L zënter soziel nuef “La Spona” a Pidrò tl chemun da La Val ie na strutura multifunzionela a livel de valeda. Tlo iel unì njenià na berstot per persones cun handicap, n local ulache l unirà vendù i pec fai tla berstot y la pert residenziela che pieta lerch nchin a 14 persones andicapedes. La strutura a Pidrò à 5.580 metri de cubatura y à custà 4,34 milion de Euro cun i grunc y la mubilia leprò. La Provinzia de Bulsan ova nciarà l Chemun da La Val de frabiché chësc zënter, ti metan nce a desposizion l finanziamënt. La strutura fineda unirà aministreda dala Comunità Raionela dla Val de Puster.
L fin prinzipel dla strutura nueva ie chël de judé y sustenì la persones cun handicap dla Val Badia n cont dl lëur y dl’abitazion. Tla berstot iel udù dant de to su nchin a 20 persones. Tla pert residenziela dl zënter iel cater de pitli cuatieres cun 7 liec y cater majons cun 7 liec.
I lëures per l zënter “La Spona” ova bele metù man tl ann 2003 y nscì ie la giaurida stata drët sentida dala populazion y dai aministradëures. Per l’ucajion iel unit adalerch l presidënt dla Provinzia Luis Durnwalder, l assessëur provinziel Florian Mussner. I aministradëures dla Comunità Raionela dla Val de Puster y ambolc dla Val Badia. L ton da festa per la giaurida à dat l cuartet Göma, la Böhmische da La Val y l grup musichel de persones cun handicap, “Miteinanders”.
Deberieda cun la Ciasa de Palsa a S. Martin y la sënta dl Raion sozio-saniter a Piculin, cumpleteia l zënter a Pidrò l servisc n cont de strutures residenzieles sozieles per la populazion dla Val Badia.
AS
