Atualità
L Museion nuef ie daviert
USP – Cun na gran festa y truep nteressei ie unì gaiurì la sënta nueva dl Museion, l museum de ert moderna y contemporanea a Bulsan. Cun la strutura nueva ie nce unì fat puenc nueves da jì a pe sëura l ruf dla Talvera. “L Südtirol cëla ala storia ma l uël nce se giaurì al daunì, l Museion ie n var de chësc viers” nscì l presidënt dla provinzia Luis Durnwalder pra la giaurida n sada. Ghest de unëur ie stat l ambolt der Berlin, Klaus Wowereit che à lecurdà che fé nvestimënc tla cultura uël di fé de bon nvestimënc che fej nce crëscer la cumenanza.
La jonta provinziela à tres si presidënt Durnwalder rengrazià la gran cumpëida de zitadins che ie unic ala giaurida demustran si consens de viers dla sënta nueva. Chësta strutura culturela lieia la zita vedla cun la pert nueva ma nce duta la provinzia danter nord y sud. L duvier de n raion de sëida ie propi chël de aministré te na bona armunia l passé da una cultura al’autra, nscì iel unì sorissà pra la festa de giaurida.
Durnwalder à lecurdà che l’autonomia se damanda gran respunsabltà tl fé nvestimënc te strutures y talënc, de no sëuraudëi l valor dl viver deberieda y l valor de trëi cultures che se svilupea y se respetea. Per l presidënt testimonieia la giaurida dl Museion che l Südtirol uel se giaurì al’Europa y al daunì. Chësc se spiedla tl frabicat daviert y linëus, luegia de ancunteda danter persones y artisć. L nvit de Durnwalder ie stat chël de ti dé vita ala sënta nueva cun dialogh y toleranza, nce se l’ert moderna unirà datrai criticheda. Messon avëi l sneit de se nfidé y la ulentà de se mëter n discuscion.
L nteres per l Museion ie nce unì da oradeca. Priejei ie stai i cumplimënc dl ambolt de Berlin, Klaus Wowereit, prim zitadin dla capitela tudëscia y zità de ert de gran inuem mundiel. L ambolt à lecurdà che chësc museum ti dà atrazion y flair internaziunel al Südtirol.
as
