Atualità
Jonta provinzela: aiuc per studi y trasport
USP - Tla sendteda dl guviern Provinziel, n lunesc ai 26 de mei ie danterauter unì dat pro de plu cuntribuc per sustenì la puscibltà de scola y studi. Tl trasport publich ti vënien mo deplu ncontra ala families y ala jënt de tëmp. L mpëni per miuré la forza de compra dla populazion va inant.
Pruvedimënc per la forza de compra
La Jonta provinziela ie jita inant cun si analisa di pruvedimënc per miuré la forza de compra dla populazion. L guviern a Bulsan uël nvië via de plu pruvedimënc cun cuntribuc per la families, pusciblteies de tré ju dala chëutes, sustëni ala families de majera cumpeida y priejes lascei do sun tarifes y abunamënc per la jënt economicamënter plu dëibla. Duc i pruvedimënc unirà dai pro duc deberieda te n pachetl ala fin de juni. L presidënt Durnwalder à dit de ulëi rujené cun la banches y cun la lia di marcadënc per valuté co miuré la cundizions n cont de fic y priejes.
Cuntribuc de studi
De plu studënc giaperà cuntribuc de studi permez ai ultimi ani. La jonta provinziela à dat pro de ndut 31,8 milions de euro per assistënza scolastica per l proscimo ann de scola. Chisc sustënies va a bën de sculeies dla scola de ublianza, scoles prufescioneles y studënc de scoles spezieles che muessa jì ora dla provinzia a scola. La Jonta à nce dat pro cuntribuc a 687 studënc dla Universidà de Bulsan y a 1650 studënc che fej universiteies oradeca. Nuviteis ie nce n cont dla mesures mascimes n cont dl davani di studënc y dla families per giapé i cuntribuc.
Per judé l dërt de studi iel unì dat pro sustënies per libri de scola, cëses di studënc y spëises de viac. A pert vën mo dai ora cuntribuc per i chemuns che mët a ji la mensa per sculeies, aiuc per sculeies cun handicap y organisazions che cëla di mutons do scola.
Cuntribuc per cëses di studënc
L Guviern provinziel à dat pro 2,67 milion de euro per sustenì 22 cëses di studënc. La majera somes ti va al Vinzentinum de Persenon cun 293.983 euro, al Augustiner Chrherrenstift de Neustift cun 227.361 € y ala cësa di studënc St.Georg de Bulsan cun 224.679 €.
Priejes lascei do per l trasport publich
L ie unì dat pro mudazions mpurtantes per smëndrì i priejes dl trasport publich. Sun la cherta per familes uniral lascià do l 50% bele cun l prim mut. Per jënt de tëmp sëura 60 ani che tol for la medema linea ie ënghe udù dant de lascé do l priesc dl 50%. Cun 65 ani giaten n abunamënt a duc i mesuns de trasport (curiera, furnadoies, ..) per 100 euro al ann. Chëi che à bele cumplì i 70 ani giapa chësc abunamënt a duc i mesuns de trasport per debant.
Sustëni per la scumënciadives da instà per mutons
L ie unì metù a desposizion 5 milions de euro per scumënciadives de jëuni y mutons ntan l instà. L ann passà iel de ndut stat 35.000 jëuni che à fat pea pra de tel scumënciadives, metudes a jì da de plu urganisazions, sciche l VKE. Metù a jì ie per ejëmpl dis da ste al mer o samont, cursc y juesc.
Rendicont dl bilanz provinziel 2007
L ie unì dat pro l rendicont generel dla Provinzia 2007 cun ntredes per 4.674.109.405,24 euro, spëises per 3.748.441.690,44 euro y nscì n avanz de 349.858.786,41 euro.
as
