Atualità
Sculeies dla mesana, lerneri a dis
USP – N valgun dis te berstot, te butëiga o te ustaria possa per sculeies dla terza mesana no me vester na bela speriënza, ma nce n aiut a to na decijion per si daunì tl lëur. Tl Palais Widmann a Bulsan iel (ncuei) mierculdi 28 de mei, unì prejentà l proiet per sculeies dla mesana de vester lerneri per vel dis.
Te vel raions dla provinzia iel bele unì sperimentà cun suzes la puscibltà che sculeies dla mesana posse ji n valgun dis dai artejans per se fé na idea co che ti savëssa a deventé lerneri. “La sperienza ie stata bona sibe pra i sculeies nstësc, che pra genitores, nsenianc y artejans”, à dit l diretëur de cumpetënza Günther Andergassen. L scola fej tres chësc proiet n var de viers dl mond pratich y per i artejans iel n prim cuntat cun jëuni che pudëssa n di deventé no me lerneri ma nce culaburadëures tl’aministrazion, tecnics o esperc sun l svilup di prudoc.
La Scola y la Lia di artejans à laurà ora na cunvezion che mët a post i “dis da lerner”, nce dal pont de ududa de dërt. L ie unì regulamentà dumandes de assegurazion, l’apruvazion di genitores y l cumpaniamënt di sculeies tres n tutor canche i ie pra i artejans. Ntan i dis metui a ji tres l proiet ne possa i sculeies nia lauré y l nseniamënt tla mprejes possa me unì fat da nsenianc.
I dis per mparé a cunëscer l artejanat dëssa dé urientamënt y vester fundamënta per muever tl mond dl lëur. Sëuraprò possa chisc dis vester de utl per astilé ora caji de sculeies che lascia la scola per via de na fauza vela do la scola mesana.
as
