Atualità
Delegazion dl Israel cun l assessëur Mussner tl Museum Ladin
USP - Na delegazion dl Israel à ntan l ultimo fin dl’ena vijità l Museum Ladin a San Martin de Tor meneda dal assessëur ladin Florian Mussner.
15 persones dal Israel, tl Südtirol sun nvit dl Academia Europea y dl Zënter per la pesc tl urient, à vijità la scola mesana a San Martin y l Museum Ladin Ćiastel de Tor. L assessëur Florian Mussner y l vizepresidënt dl museums provinziei Heinrich Huber, à dat l bënunì ai ghesć. Tres l museum à pona menà l culaburadëur scientifich Herwig Prinoth. La delegazion dal Israel à mustrà gran nteres per la storia y la cultura ladina. Tres tel ancuntedes vëniel a se l dé n barat de ideies y mplù judeles a fé cunëscer l Museum Ladin nce te raions plu da dalonc, à dit l assessëur Mussner. Ël nstëss se ova dat ju cun la crisa tla tiera santa pra si lëur dla matura y ova nscì svilupà sesibltà per chësta problematica. Rujenan cun la persones dl Israel à Mussner auzà ora la mpurtanza per i Ladins dl cuntrat de Paris y dl segondo statut de autonomia. La lege che ti ova dat ai optanc la puscibltà de deventé inò zitadins taliani pudëssa unì valutà sciche l unì ancontra da pert dla Talia.
as
