Atualità
Simposium „Lëures publics – na ncëria culturela“
USP – I lëures publics ie bën de plu che mëter a desposizion strutures, de chësta minonga fova i esperc dl simposium de architetura ntan l fin dl’ena a Auer, duc a una. Sun nvit dl assessëur ai lëures publics Florian Mussner iel unì tenì na discuscion sun l daunì di lëures publics.
Chësta discuscion, nsci se mbincia l presidënt dla provinzia Durnwalder ne ie nia me penseda a livel academich. Adurvon n dialogh su l daunì dl frabiché, che tën cont dla funzionalità, dl custimënt y dla drëta relazions pra la grandëzes y l passené tla cuntreda, nscì Durnwalder. Tl dialogh iel da to ite la populazion che ie chëla che adrova la strutures y che les paia nce. Fajan referimënt ala lege urbanistica al dit che n cëla bele che l ne vënie nia frabicà da nuef ora di zëntri, mantenian l carater di luesc.
L assessëur Mussner, che à nvià via l symposium, à auzà ora l duvier culturel che n ti va to tl ciamp di lëures publics. “Ala fin dla finedes ne se tratela nia de frabiché cuantità, ma che chël che vën frabica sibe nce fat bën dal pont de ududa tecnich y architetonich”, nscì l assessëur ai lëures publics. “De bona architetura che sibe nce inovativa, urienteda al daunì zënza purté majeri custimënc, chësc dëssa y muessa vester l fin dl dipartimënt di lëures publics” à dit Mussner.
Al simposium a Auer oven nce nvià l minister al economia dl Bayern Emilia Müller, che à dit che adurvon de pitli ufizies spezialisei che ie liei a si ncësa y che l mostre nce tres si architetura. Ntan l symposium iel danterauter nce unì sorissà la mpurtanza di cuncorsc publics che porta pro a mantenì cuncurënza y cualità.
as
