Atualità
Sëurandà i lëures pra l puent a Runcadic
USP – L puent a Runcadic, dan ruvé a Urtijëi devënta plu segur. L Ufize provinziel per apalc à pudù sëurandé i lëures per cumedé l puent sëura l Derjon de Gherdëina. L puent unirà nce slargià per la streda dala rodes.
L puent a Runcadic fova dancà sun la lista di lëures de prëscia. “Bele n pez fovel tlo unì metù parëies de peton acioche i auti ne furneie nia tan orainsom, śën fovel gra ëura de fé zeche per la segurëza dla truepa persones che passa tlo uni di” à dit l assessëur ai lëures publics Florian Mussner. I lëures de ressanamënt vëij dant de tò demez la seva che ie tamez. Chësta pudëssa aldò di respunsabli per l’eghes da mont, tenì su material che vën menà dal ruf y vester periculëusa. Sun dumanda dl Cunsorz di Chemuns de Gherdëina y de Ciastel uniral cun chisc lëures nce slargià l puent per fé passé la streda dala rodes.L ncëria de cumedé y slargë l puent a Runcadic ti ie jita la firma Rella de Urtijëi. Sun la soma scrita ora de 484.500 Euro ie la firma dl post stata la sëula a dé ite na ufierta, pitan 414.000 Euro, che fej ora 14,5% de manco.
as
