Atualità
Finà via i ejams dla scoles mesanes
USP – Drët bën à i sculeies dla terza tlasses dla scoles mesanes finà via si ann de scola. Danter 220 candidac ladins à bën 29 arjont la miëura notes, che uel di che sun feter 8 sculeies nen iel un cun la miëura notes. Chëst ann iel stat n majer mpëni per via dla nuvità de na prova scrita sëuraprò.
L'edizion de chëst'ann dl ejam de scola mesana à purtà na prova scrita de plu, chëla naziunela dl INVALSI (Istitut per la valutazion dl sistem dla valutazion), che fova na sort de test de rujeneda y de conc. L se tratova de na prova sperimentela per giapé nfumrazions sun l rendimënt di sculeies y dla sculees a livel naziunel. A chësta maniera iel stat n dut bën cin' proves scrites tla scoles mesanes ladines (ladin, tudësch, talian, conc y prova INVALSI). Daviadechël fova l ejam bëndebò sfadiëus, cunscidran nce l'età di candidac. Sëuraprò fovel, sciche uni ann, da fé n colloquium interdiszipliner, ulache l univa adurvà duta la rujenedes dla scola.
Dut chësc à cumpurtà n gran lëur urganisatif per la scoles y per la cumiscions de ejam y l ie da ti fé na gran lauda che dut sibe jit a puntin. Mo de plu plajëi fej l resultat positif per duc i candidac che à tëut pert al ejam.
L plu sculeies cun la miëura notes iel chëst ann stat a Al Plan. Danter i 30 candidac à 7 sculeies arjont la miëura notes, che ie belau uni cuarto. Tl’autra doi scoles mesanes dla Val Badia iel stat 41 candidac a la Ila (duc passei, 1 ottimo) y 42 candidac a S.Martin (1 ottimo). Tla majera scola mesana dla doi valedes, a Urtijëi ie duc i 62 candidac passei, 13 nchinamei cun la miëura notes. Nsci iela nce stata te Sëlva ulache duc i 45 candidac à pudù finé via la scola mesana, 7 à finà via cun la miëura notes.
USP
