Atualità
Chëst ann de plu posc a desposizion tl albierch “Assudëi”
USP - Chëst ann possa la cësa“Assudëi” ti pité albierch a 12 sculeies mplu. “Bele l ann passà se ova scrit ite de plu sculeies de chëi che ne pudan tò su, perchël ons trasfurmà 12 majons doples te triples”, nsci dij l assessëur Florian Mussner.
Ti mënsc da d’instà iel unì metù leprò mo n liet, n castl y na mëisa da scrì te 12 majons doples da ca. 26 m2. Śën à lerch 53 jëuni, l ann passà pudoven mé cuncé ju 41 jëuni. “Pervia dla gran dumanda y ajache la normes l cunzed, me stajovel a cuer aumenté l numer di posć de albierch” spiega l assessëur. La cumpëida di sculeies da oradecà tla scoles autes de Urtijëi ie avaneda ti ultimi ani. Chësc ie n sëni che la scoles autes ladines vën prijedes nce dai jëuni oradecà y ti va ancontra ai bujëns di jëuni ti giaurian perspetives per l daunì, nsci Mussner.
D’instà iel nce unì metù ite la mubilia tl foyer y tla sala televijion. N à pudù finé via cun i lëures dan l mëterman dla scola.
SAN
