Atualità
Unëur ala miëura matures
USP – Sculeies dla trëi grupes de rujeneda che à fat la matura cun la miëura notes ie unic unerei (ncuei) juebia 25 de setëmber dal presidënt dla Provinzia de Bulsan y dai assessëures ala scoles. Di 119 unerei ie cinch dla valedes ladines.
“L gran mpëni y la bona cualiteies di sculeies che à fat la matura cun 100 sun 100 ponc dëssa unì valorisà publicamënter” cun chësc pensier à l assessëur ladin unerà i cin jëuni dla valedes ladines. I unerei ie Vanessa Crazzolara de S.Ciascian (Scola d’ert Urtijëi), Corinne Cannins (ITC La Ila) y Stefanie Irsara (Lizeo La Ila), tramedoves de Badia. Verena Moroder (gymnasium real de Persenon) y Bean Stuflesser (ITC Walter Bulsan) ie tramedoi de Urtijëi.
Da pert dl’aministrazion provinziela an laudà i sculeies dla trëi grupes de rujeneda che à arjont la miëura notes, per avëi purtà n resultat straurdiner. Da pert aministrativa an nce sorissà che n fej dut l puscibl per l’istruzion y che chëi che à cualiteies plu autes dëssa tl daunì nce sëurantò ncëries plu mpeniatives. De chësc vies à l presidënt dla provinzia lecurdà che l ie mpurtant che dut l sistem scolastich vede bën, che l vën nce fat nvestimënc per avëi n duman jënt cun na bona furmazion che possa tò la decijions mpurtantes. “Dal’autra pert ne dëssa l pudëi jì a scola nia fé deferënzies danter rich o puere. L ie unì metù a jì n servisc de trasport che ruva feter sëura dut l raion y uni un possa se crì ora la scola auta aldò de si ntresc y cualiteies” à dit l presidënt dla provinzia.
72 unerei à fat la matura cun 100 ponc te na scola tudëscia, 44 te na scola taliana y 3 te na scola ladina. La particularità dl ejam de maduranza tla scola ladina ie che i candidac muessa fé la proves scrites te doi rujenedes. A usc vëniel pona adurvà belau for duc i lingac dla scola, chël uel dì che tl Lizeo Linguistich da La Ila y tl ITC Raetia de Urtijëi possen ruvé a adurvé cin’ rujenedes. N fej cont che de duc i unerei jirà feter 2/3 inant al’università. Nce te chisc cajio juda la Provinzia sustenian i studënc per l albierch y cun na borsa de studi. Fajan nce nvestimënc tla ricerca y tl inuvazion vëniel nce metù a jì posć de lëur aldò per chëi che à fat n studi.
Da pert di trëi assessëures ala scoles iel uni rengrazià nsenianc, respunsabli dla scola y i genitori che à fat a na maniera che i jëuni ebe pudù arjonjer i bon resultac. I sculeies ie unic nviëi a nuzé si bona cualiteies les metan a desposizion dla cumenanza.
as
