Atualità
Dala Jonta provinziela dl 13 de utober
USP – La crisa finanziera y si cunseguënzes sun l’economia tl Südtirol ie ncuei stat l’argumënt zentrel dla senteda dla Jonta provinziela de Bulsan. Do na prima descuscion sun i pruvedimënc da tò, aspieten che la banches, i fonds de pension y i partner soziei feje si cunsulënzes, dan fé vares cuncrec. Te Jonta provinziela iel mplu nce unì rujenà dla cuotes dl lat, la furmazion de dutores spezialisei y de mprësc per studënc.
Crisa finanziera tl mond y la cunseguënzes per Südtirol
Sce n rejona de cunseguënzes dla crisa finanziera per nosta provinziel iel da tenì cont de trëi ponc prinzipei, sorissea l Presidënt dla provinzia: seguré i sparanies, la stieres y la pensions. “Te degun de chisc ciamps ne pudons mudé l mond, tlo ie damandeda la union dla nazions, la Union Europea y i singuli stati”, nsci l Presidënt dla provinzia. L fossa propi zënza respunsabltà sce la Jonta provinziela ne chirëssa nia do pusciblteies per jude de chieté la turbulënzes tl’economia y l marcià finanzier tlo da nëus. Ntan chëst’enes tenirà l Presidënt dla provinzia cunsulënzes cun la banches, fonds de pension, unions economiches y sindacac. Cun la banches uniral rujenà de co ti unì ancontra ala mprejes ndebitedes y co mëter a desposizion d’auter capital. Ciun i fonds de pension se tratela de stlarì tan segures che ie la pensions tenian cont dla melsegurëza di marcieies finanzieres, te chëi che i fonds à metù i scioldi.
“La va nce de abiné soluzions a problems che nes spieta n cont dl raport danter lauranc y patrons de lëur” dij l Presidënt dla provinzia. L’aministrazion publica juderà de chësc vieres. “I pruvedimënc, de chëi che on rujenà ncuei, unirà cuncretisei do avëi rujenà cun reprejentanc economics y di lauranc.” Nsci l Presidënt.
Mprësć per studënc: grupa de lëur
La puscibltà de mprësć zënza fic per studënc che ne giapa nia cuntribuc de studi, ie ncuei unida trateda dal Guviern provinziel. “Chësc dëssa vester n aiut per chëi che ie amez ite n cont de davani, che ne giapa zënza nia cuntribuc ma che vën sëuraciariei canche la va da paië l studi” dij l Presidënt dla jonta. Co che sarà la cundizions per mprësć nchin a 6.000 Euro al ann per studënc, ciuna cumbinazions cun d’autra borses de studi y co che l dëssa unì paià ju, dëssa stlarì na grupa de lëur. I mprësc ne ie nia da se aspité dan l scumencé dl proscimo ann academich.
Plu liec per pazienc grieves
Te duta la Provinzia dëssel unì pità assistënza per pazienc n pont de mort. Nsci vëniel anjenià de plu liec. Tl sëul zënter de medejina paliativa, Martinsbrunn a Maran, uniral anjenià 12, mpede 8 liec. Leprò vën mo doi nchin cin liec ti raions saniteres.
Cuncorsc per dutores spezialisei: 46 stieres
I dutores jëuni dl Südtirol à trëi pusciblteies de spezialisazion. N iede la furmazion te na tlinica tudëscia oradecà, na furmazion te na tlinica taliana o scenó te n spedel dl Südtirol. Al mumënt iel feter 100 dutores jëuni te spediëi tudësc, 46 te taliani y 130 tl Südtirol. Ncuei iel unì dat pro cuncorsc per la furmazion de 26 stieres da dutor tl Südtirol y 20 te tliniches tudësces oradecà. Per chëi che va oradecà tla tliniches cunvenzioneles dà la Provinzia borses de studi y finanziamënc per la furmazion.
De plu cuotes dl lat
Permez al ann passà puderà i paures de ju de plu lat pro hectar. Mpede 14.000 chilo per hectar, puderal n auter ann unì dat ju 16.000 chilo pro hectar.
Program per i ruves da mont
Per lëures de mantenimënt dl fonz, per ruves da mont y per pruvedimënc contra la levines à l Guviern provinziel dat pro 13 milion de Euro.
Magasins di destudafuech
Per fe sù, ngrandì o cumedé 13 strutures di destudafuech te duta la Provinzia, à la Jonta provinziela metù a desposizion 6,14 milon de Euro.
Finanziamënt per la Scola de teologia
Per la Scola auta de teologia a Persenon à la Jonta provinziela udù dant 594.000 Euro.
as
