Atualità
Abunamënc per seniores zënza lëtres
USP – Jënt de tëmp sëura 70 ani possa tl Südtirol furné debant cun i mesuns de trasport publics. Da n auter ann inant iel de bujën de n abunamënt aldò, che n possa apusté tl dipartimënt provinziel per la mubilità. L ie unì mandà ora na lëtra a uni persona de tëmp cun l formuler per damandé l abunamënt, sce zachei ne l ëssa nia giapà, adrovel me da cherdé su.
Al mumënt possa duta la persones sëura 70 ani furné debant cun la curieres, ferates y furnadoies che fej pert dl trasport publich, nce zënza abunamënt. L basta mustré n documënt de identità. Chësta regulamentazion provisoria vel me nchin ala fin dl ann. Dopro adroven n abunamënt per furné debant cun i mesuns publics. Chësc abunamënt ne costa nia, ma l muessa unì damandà tl dipartimënt provinziel de mubilità.
“On cialà de la mëter a jì che l sibe drët scëmpl, on scrit a duc i seniores sëura 70 spiegan co fé dumanda y mandà pea l formuler”, dij l assessëur ala mubilità. L possa purempò suzeder che per una o l’autra gauja tecnica ne ebe nia duc giapà chësta lëtra. Chësc ne fej nia, ajache nteressei possa se damandé l formuler tl dipartimënt de mubilità cherdan su l 0471 413402.
L abunamënt debant per seniores vel per duc i mesuns de trasport publich dla Provinzia de Bulsan. Furné possen cun la curieres, la furnadoies de Meransen, de Jenesien, sun l Renon, a Mölten, Vöran y sun la Mendula, y nce cun la ferata dl Renon. L abunamënt vel nce per la ferates regiuneles nchin a Trënt che à l sëni “R” sun i orares. Per la ferates EC, IC, Euronight y Eurostar, ne vel l abunamënt debant nia.
as
