Atualità
Cuncors per na zircunvalazion te Sëlva
USP – La Provinzia de Bulsan à scrit ora n cuncors de ideies per na streda de zircunvalazion te Sëlva. Cun chësc var scumëncia la prima pert de proietazion per abiné na soluzion al gran muvimënt di auti che passa tres l luech de Sëlva. “Tres l cuncors de ideies puderan udëi co miuré cuncretamënter l problem de viabilità per Sëlva” sorissea l assessëur ala stredes.
Ai proietisć nteressei vëniel dant na gran lidëza. Ulà che dëssa scumencé y finé la streda de zircunvalazion, da ciuna pert dla valeda, cun puenc, tuniei o vel autra maniera de fé passé, dëssa unì a lum tres l cuncors. A chësta maniera puderà unì abinà la miëura soluzion per Sëlva. “On njenià ca dut a na maniera che cun l scrì ora dl cuncors à śën scumencià chëla pert dla proietazion te chëla che l vën cuncretamënter jit ncontra al problem di truep auti che passa tres Sëlva” spiega l assessëur ala stredes.
Ai architec y injenieres vëniel spezificamënter me damandà de purté prupostes co unì ora dla streda de zircunvalazion al’autëza dl zënter luech. Nsci possen arjonjer la lueges de majer nteres sciche i purtoies dai schi, zënza messëi passé tres l luech. L vën damandà ideies co fé na ntreda tl zënter, nscì schiche l ie nce tl cajo dla zircunvalazion de S.Cristina.
La soma mascima ududa dant per i lëures nstësc y i pruvedimënc de segurëza ie de 32 milion de Euro. (Te chësta soma ne iel nia l’IVA, la despuscion y la pert per custimënc nia udui danora.) Davia che l se trata de tan n gran custimënt à l cuncors messé unì scrit ora a livel de Europa.
Tl cuncors de ideies messeran mplu sambën tenì cont dla situazion geologica. Da pert dla Provinzia de Bulsan iel bele unì fat proves geologiches, nrescides y analises per njenië na basa de nfurmazion per l cuncors.
Nchin ai 3 de fauré saral pona tëmp per dé ju la ideies y prupostes per la streda de zircunvalazion te Sëlva. I criteries de valutazion sarà prinzipalmënter la funzionalità tecnica, la cualità dl frabiché y dl’architetura. L proiet messerà passené tla cuntreda. I prufesciunisć nteressei puderà jì a se tò la documentazion nchin ai 7 de nuvëmber.
as
