Atualità
Durnwalder anconta l presidënt de Belun Reolon
USP - Jì inant cun la culaburazion danter la Provinzies de Bulsan y Belun, dantaprima tla mobilità, cultura y nfrastrutures. Chësc à l presidënt Durnwalder ncuei (25 nuvëmber) segurà a Bulsan al presidënt dl Belun Sergio Reolon. Argumënt de culaburazion ie nce la grupa de rujeneda ladina.
L presidënt Reolon à prutà dant l gran ntres de lauré deberieda tl ciamp culturel tl raion dla Dolomites. Tlo pënsen dantaldut al mantenimënt y svilup dla cultura ladina, y pona nce ala coordinazion de majera manifestazions sciche l’enes Gustav Mahler a Toblach y l festival de jazz a Cortina. “N cont dla cultura ladina, pieta Bulsan de se dé da fé nce a Roma per ngrandì la nfurmazion ladina tl radio y tla televijion, y pona mo la nrescides storiches y de rujeneda n cont dla Ladinia storica” lecorda Drunwalder.
Tl’ancunteda a Bulsan à Drunwalder y Reolon rujenà dla daunì da mobilità tl’Elps jan ite sun la mudernisazion dla ferates y di culegamënc de stredes. Mpurtanza ti iel unì dat al valorisé la stredes alpines sciche i pasc dla Dolomites miuran l servisc de trasport publich y la regulamentazion dl muvimënt. “Ulon miuré l culegamënt danter Puster dessëura y Cortina, Belun y l jëuf de Valparola” à dit Drunwalder. “Ulon pudëi pité n bon sistem de mobilità cun l aiut de n program Interreg.”
Durnwalder y Reolon à nce rujenà de co valorisé miec la nfrastrutures che la doi Provinzies à ti raions de sëida. “Rujenon tlo dantaldut dla losa da bob a Cortina y dl zënter Grand Hotel a Toblach” à spiegà Drunwalder. Deberieda uelen nce lauré n cont dla sanità tres l spedel de Sanciana/Innichen. La vijion di doi presidënc muessa śën mo unida laureda ora da tecnics per pudëi lauré ora n documënt sciche basa giuridica dla culaburazion danter la Provinzia de Bulsan y de Belun.
as
