Atualità

Fundazion per l patrimone naturel

Da pert dla Provinzia de Bulsan ulëssen che la Dolomites unissa recunesciudes dal Unesco sciche arpejon de patrimone naturel. “Per arjonjer chësc iel debujën de na fundazion y ncuei iel unì dat pro i statuc” à spiegà Durnwalder. Tl cunsëi de aministrazion ie reprejentedes la trëi provinzies tuchedes: Bulsan, Trënt y Belun che se barata ju tla presidënzia. Leprò uniral mo fat n cumité scientifich y na reunion di simpatisanc dla fundazion.

Lege finanziaria

L bilanz provinziel ne dëssa chëst ann nia jì sëura 5,4 miliardes de Euro. “Te chësta situazion ne ulons nia fé debic” nsci a Drunwalder spiegà ciuldì che la va mo de smedrì custimënc per chësc ann. La gran discuscion dla Jonta da ncuei ne à mo nia purtà a na contlujion definitiva. Ntan l’ena uel l presidënt Drunwalder mo rujené cun de pu assessëures a na maniera de pudëi n lunesc che vën stlù ju la pruposta de bilanz y la mandé inant te Cunsëi. L ie truep ciamps che se damanda n majer finanziamënt, danter chisc la scola, l’economia tucheda dala crisa y l trasport publich che n uel mo miuré. “Messon purempò abiné na streda co smendrì de 150 milion la soma che on al mumënt” nsci Drunwalder.

Bilanz provinziel

N cont dl bilanz provinziel iesen drët a una. Mo da fé ora ie la cuestion di museums. Feter duc ie sota gestion de na istituzion zentrela. Śën vëniel rujenà de lascé vester chësta istituzion per sparanië scioldi. Dan tò na dezijon se à la Jonta damandà na documentazion plu avisa.

Ntant à la Jonta dat pro de unì anconta cun l priesc de Università per persones cun handicap y chëi che giapa na borsa de studi. Per motorins ulëssen tò demez la chëuta de zircunvalazion ajache l mpëni de aministrazion costa de plu che no chël che la chëuta porta ite. N cont de finanziamënt per i chemuns ie unì udù dant 98 milion per nvestizions y 75 milions per ti judé ai chemuns a paië ju debic. Cun n fond de rotazion de 100 milons uniral dat ucajion ai chemuns de mpresté scioldi zënza fé debic nueves.

Per la gestion dl strom y dantaldut l mandé ora pra la cëses (custimënt 70 milion de Euro) iel debujën de dé n majer finanziamënt ala sozietà, de sëurandé na pert ai chemuns o de fé na sozietà nueva. Nce per la sozietà de trasport STA iel debujën de plu scioldi. “Messon i mëter tla situazion da pudëi cumpré ferates, mantenì la scines y la stazions” à dit Drunwalder. N gran nvestimënt ie l furnel nuef dal refudam a Bulsan. Per chëst ann iel me debujën de na sëula milion de Euro, ma per l ann che vën messeran udëi dant 40 milion.

Per ti unì anconta a chi che ulëssa se anjenië n auto a gas, uel la Jonta dé la puscibltà de ciarië l gas a cësa. “Chësc vel me te chëi raions ulache l ne ie nia udù dant na pumpa dal penzin cun nce gas” nsci l presidënt. La Jonta à udù dant 200.000 Euro per chësc capitul.

Fiera Protect

La Jonta à dat pro la data dl 27 nchin 29 de merz per la fiera dedicheda ala prutezion zevila y la lies ulenteres de prim aiut. La fiera Protect a Bulsan unirà sustenida dala repartizion provinziela per la prutezion zevila.

Normes de bonifica

La Jonta à dat pro la pruposta de lege prejenteda dal assessëur Berger per la normes de bonifica dl fonz. Te chësta materia iel a livel naziunel mo ndrova n decret che fova unì dat dal rë dla Talia dl 1933. La pruposta de lege provinziela vëija dant normes aldò dl tëmp per avëi na regulamentazion plu a puntin.

Cunvëni sun l lëur ti raions da mont

La Jonta provinziela à dat pro de fé pea l cunvëni sun l lëur da paur ti raies da mont, che unirà tenì n vënderdi ai 6 de fauré a Bulsan. Ai 31 de merz saral nce n forum a Bruxelles.

Vizediretëur generel

Eros Magnago ie unì numinà vizediretëur generel y à nscì giapà la segonda majera ncëria provinziela. Do che Hermann Berger ie devëntà diretëur generel, tol Magnago si stiera da vizediretëur.

Furmazion tl artejanat

Na cumiscion aposta deberieda cun l Ufize provinziel de cumpetënza dëssa pudëi recunëscer diploms de furmazion artejanela che ie unida fata oradecà.
Canche n patron de lëur tol su lerneri che ne ie nia plu tan jëuni o che à bele na matura, ulëssen ti sparanië de messei fé l curs de furmazion didatica per pudëi tò su chisc lerneri.