Atualità
Fond soziel europeich – 13 milion de Euro contra la crisa
USP – La rejons, i fins, presuposc' y dates n cont dl sustëni nuef da pert dl Fond soziel europeich (ESF) iel unì prejentà n vënderdi (13 de merz) a Bulsan. “La particularità de chësta bandida ie che a chësta maniera vëniel tëut pruvedimënc che ti va a bën dla persones tuchedes dala crisa economica” dij l assessëura Barbara Repetto.
De merz ie la bandida dl cuncors unida publicheda sun la plata www.provinz.bz.it/esf tl internet per sustenì proiec de furmazion ti ani 2009 y 2010. L ti vën tlo dat pëis ai pruvedimënc per sustenì chëla persones che à perdù valor sun l marcià dl lëur per via dla crisa o che à nchinamei perdù l lëur. “Chësta persones ne daussa nia pierder l cuntat al mond dl lëur y tl medemo mumënt dëssen pudëi nuzé l’aurela che resta pra n lëur a mez tëmp, per fé furmazion” dij Repetto. Per la furmazion n cont dl se adaté iel 6,7 milion de Euro a desposizion, per sustenì l lëur, autri 3,6 milion de Euro.
Cun i scioldi dl Fond europeich dëssel dantaprima unì sustenì proiec de furmazion per dependënc y padrons de lëur, che vën da categuries tuchedes dala crisa. “L vën dat preferënza a proiec de firmes che mët a jì da nuef la produzion o la strutura dla firma, chëi che fej inuvazions tecnologiches, pruvedimënc per sparanië energia y proiec de tueda” dij l’assessëura.
Per jì contra la crisa vëniel dat pëis ala furmazion per jënt sëura 45 ani, per jënt cun cuntrac particuleres a tëmp determinà, dependënc de firmes che sposta la produzion te paejes cun paiamënc basc o dependënc te cassa ntegrazion. Cun i aiuc ala furmazion uelen nce sustenì che l vënie metù su firmes nueves.
Prupostes de proiec che reverda la bandida dl Fond soziel europeich possa unì dates ju nchin ai 15 de auril. Nfurmazions mplu ie da giapé tl Ufize provinziel per l Fond soziel europeich.
as
