Atualità
Maroni y Durnwalder pra mëisa de descuscion: prupostes te sies mënsc
USP – Nchin ala fin dl mëns na pruposta sun argumënc y tëmps, nchin te mez ann prupostes cuncretes: chësc à cunedì l minister per cuestions nternes Roberto Maroni n vënderdi sëira (3 lugio) a Bulsan do la mëisa de descuscion sun la cunvivënza. “Duc chëi che à rujenà pea à nce dit l’aurità, spere medrë che la ulentà de rujené cun scerietà vënie nce cuncretiseda. La va de lauré per soluzions y no per se tré ora velch a fin politich” à detlarà l Presidënt dla Provinzia Luis Durnwalder.
Scumenciadives cuncretes aldò de n program à mpermetù l minister Maroni a Bulsan. “Nchin ala fin dl mëns purterei dant na pruposta sun argumënc y dates dla mëisa de descuscion, da setëmber inant uniral laurà per sies mënsc per lauré ora prupostes al’aministrazions che messerà tò dezijions. Cun chësta paroles à l minister Roberto Maroni trat adum tant che l ie unì rujenà danter reprejentanc de istituzions, uemes de politica, uemes de dlieja, dl’economia, di lauranc.
“Uni un à nce dit n pue’ l’aurità, à dit l presidënt Durnwalder, śën sperons che la bona ulentà vënie a se l dé tla realtà de rujené de cuestions daviertes zënza ulëi se tré ora prufit politich. Messon nce de pro che permez a d’autra realteies ie nosc problems me n tan granc”. Durnwalder à nce sorissà che duc dëssa pudëi se sentì a cësa tla Provinzia de Bulsan, fé pea tla gestions dl’autonomia y viver si identità, rujeneda y tradizions”. Al Guviern de Roma ti al metù a cuer che bele massa giut resta cuestions per l svilup dl’autonomia fërmes a Roma, danter chëstes nce la nomina dla cumiscions paritetiches, la ratificazion dl’acurdanza de Madrid y di protocoi sun la Cunvenzion dl’Elpes, l ntendënt per la scoles talianes, la lista de tituli che possa unì recunesciui per l ejam de bilinguism, i monumënc di tëmps dl fascism. Mplu la cunescënza dla rujenedes y dla storia tlo da nëus. “L’autonomia muessa unì adateda ai tëmps, messon lauré cun Roma per capì cie che se lascia fé deberieda per l bën de duta la grupes de rujeneda”, nsci Durnwalder.
as
