Atualità
Facebook, Twitter, YouTube: Provinzia sun i mesuns nueves de comunicazion
Nia me i canai de comunicazion tradiziunei pieta nfurmazion sun l’atività dla Provinzia y dla Jonta provinziela. Tl majer social network, sun Facebook, ie na plata provinziela, la nutizies plu mpurtantes ie n curt sun Twitter y sun YouTube iel i video di avenimënc de majer nteres. Dut chësc te trëi rujenedes.
Internet cun si pusciblteies nueves devënta, dantaldut per la generazion jëuna, plu y plu l mesun de nfurmazion prinzipel. Chësc nia me ajache la nfurmazion possa unides ciariedes su da uni cianton dl mond, ma nce ajache chëi che liej, cëla y scota su, possa rujené pea cun comentares persunei. Chësc trend ie nce per la Provinzia de Bulsan stat rejon de zapé ite ti canai nueves de nfurmazion.
Nfati, la nutizies prinzipeles dla Provinzia de Bulsan ie śën nce sun la rë Facebook, l social network cun la majera cumpëida de partezipanc a livel mundiel che vën nce tlo da nëus adurvà dassënn. Per arjonjer la plata tlechel jì sun facebook.com y crì do „Jonta Provinzia Bulsan“ (link).
Nfurmazions curtes, da liejer aslune, ie da abiné sun la plata Twitter. Cun me puecia paroles vëniel tlo dat nfurmazion scëmpla y aslune. L adres de chësta plata ie www.twitter.com/ProvinziaBZ y tlo possen liejer do nfurmazions sun la Provinzia de Bulsan.
Mpede liejer possen nce udëi y audì video. Dantaldut per jëuni ie YouTube deventà sinonim de chësc trend, l ie la plata plu cunesciuda a livel mundiel n cont de video. Sun l canal www.youtube.com/ProvinziaBulsan iel da udëi i video di avenimënc plu mpurtanc da pert dla Provinzia de Bulsan.
La plates provinzieles sun chisc majeri social network ie unides anjeniedes tla trëi rujenedes: per tudësch, talian y ladin.
as
