Atualità
Ciampinëi, Resciesa y Armentarola tla cumiscion per defendura dla cuntreda
USP – Ciampinëi tl Chemun de Sëlva, Resciesa tl Chemun de Urtijëi y Armentarola tl Chemun de Badia ie stai argumënc dla senteda dla Segonda cumiscion provinziela per la defendura dla cuntreda da (inier) 16 de nuvëmber. I trëi proiec ie unic dai pro cun vel cundizions.
Per via de smueies ulëssa la Lia turistica de Sëlva spusté n pitl toch dl troi da mont 21 danter Ciampinëi y la cuca Tieja. L se trata de n raion daujin ala stazion a mont dla furnadoia da Sëlva sun Ciampinëi. L toch nuef dl troi ie manco ërt y ie perchël n fruz plu lonch permez a dant. Sun la pert nueva dëssa l troi avëi na larghëza de feter 180 zentimetri. La Cumiscion provinziela per la defendura dla cuntreda à dat pro l proiet a cundizion che l vedl toch vën mplenì su cun l material dl toch nuef, y che l vën fat crëscer ite. Sëuraprò muessel unì fat salieries per l’ega y paià ite na cauzion de 5.000 euro.
N cont dla mont de Resciesa a Urtijëi à la cumiscion provinziela nce tratà l proiet de varianta dla stazion a mont dla furnadoia nueva sun scines. Sciche bele pra la stazion japé se tratel de proiec bele frabichei. La furnadoia sun scines fova unida data pro dala Jonta provinziela nce sce l mancia mo la lizënza per vel mudazions. La cumiscion per la defendura dla cuntreda à dat cunferma de tant che se damanda la Jonta provinziela: nfati de pruvedimënc de cumpensazion tl raion dl parch naturel Puez-Odles y “Natura-2000”. “La mesura de chisc pruvedimënc per via dla mudazions al proiet, muessa mo unì fata ora canche l vën valutà l valor dei pruvedimënc de cumpensazion” à dit Adriano Oggiano presidënt dla cumiscion provinziela.
Do i campionac taliani de podejé sun i prei de Costa tl raion de Armentarola ulëssen nce mëter a jì garejedes de Copa Europa. Per chësta rejon à la lia turistica de Badia damandà de pudëi slargë l purtoi “Conturines” a 9 metri te doi lueges tl raion “Curva viola”. I lëures toca de ndut feter 100 metri cuadrac ulache l muessa nce unì taià lëns. La Cumiscion provinziela per la defendura dla cuntreda à dat pro l proiet a cundizion che i lëures vënie cumpaniei dal Servisc de Forestela.
as
