Atualità
Se devertì segures sun i purtoies
USP – Cun de plu pruvedimënc uel la Provinzia de Bulsan sensibilisé per n cumpurtamënt sun i purtoies dai schi che respetea i autri y la regules. L assessëur al turism Hans Berger deberieda cun esperc dl ciamp à ncuei (30 nuvëmber) prejentà i pruvedimënc per la segurëza sun i purtoies, cun danterauter nce la campania de prevenzion "RischIO? - GefährlICH?".
Dan che la sajon dai schi scumënca sun duc i purtoies vëniel mo fat de plu lëures per la segurëza. Ti ultimi ani ie caleda la cumpëida de desgrazies, à dit l assessëur Berger ncuei pra la prejentazion. Rejons per chësc miuramënt de segurëza ie che i purtoies vën aldidancuei anjeniei ca scialdi miec, l’atività di maestri de schi y l’ublianza per di mëndri de tò l casco. Sota i 15 ani iel feter 95% che tol l casco a jì cun i schi, permez al 2003 ie chësta cumpëida auzeda cin iedesc mo n tant.
Acioche chësta tendënza vede inant iel mpurtant che chëi dai schi y snowboard vënie sensibilisei a n miëur cumpurtamënt sun i purtoies y a tenì ite la regules. L’idea dl assessëur Berger ie de sensibilisé mpede straufé. „L’urelacurta uel di vester liedies, ma chësc ie me mesun sce n ne ie nia tl pericul per via di autri“ nsci l vizepresidënt dla Provinzia. Tl Südtirol vëniel uni ann 2 milions de turisć y tl raion dl Dolomiti Superski vëniel cumpedà passa 150 milions de viages cun i mplanc.
Cun la mira de sensibilisazion à la Repartizion provinziela per l turism nvià via la campania de prevenzion per la segurëza ntituleda "RischIO? - GefährlICH?". L auzé ora dl IO y dl ICH uel ti mëter al cuer al singul, sce ël se cumporta drët sun i purtoies.
Da pert dla Union di maestri de schi à l presidënt Claudio Zorzi sorissà la scumenciadives dl’ultimo inviern per respeté la regules FIS che fova unides metudes su dan 12 ani. „L maester de schi à dantaprima per i mëndri na funzion da ejëmpl y la cunescënza tecnica possa schivé desgrazies.“ Tla scoles de schi vëniel mustrà films sun devertimënt segur, fai aposta per mëndri. Ai 5 de dezëmber vëniel a Obereggen metù man cun manifestazions che jirà pona inant ai 6 de dezëmber sun Plan de Gralba, ai 8 sun Plan de Corones y do y do nce sun l Helm, Plose, a Piculin y San Ciascian, tl Ahrntal y sun l Reschen.
Deberieda cun la Ntendënza scolastica tudëscia y la Lia per la segurëza di mëndri iel unì muet scumenciadives tla scoles per mustré su periculi y nsci garantì l deveritmënt cun plu segurëza. Da pert dla union provinziela di mplanc portamont cun Siegfried Pichler y Hubert Mayrl per la Lia da Mont AVS, iel te cunferënza stampa unì tratà l jì cun la peves sun i ëures di purtoies. Tenian n cunsciderazion l regulamënt nuef per i purtoies (publicà ncuei, 30 nuvëmber tla Gazëta ufiziela dla Region) possen jì cun la peves su per i purtoies, ma nia ntan che l vën laurà cun i giac dala nëif. De chësc viers iel debujën de atuazions plu apuntin tenian cont che i orars per lauré cun i giac dala nëif dëssa vester cumpetënza de chiche à la gestion dl purtoi.
as
